كورۋ قابىلەتى، سەمىزدىك جانە جۇيكە جۇيەسى: قازاقستاندىق وقۋشىلاردى نە مازالايدى

استانا. قازاقپارات - دەنساۋلىق ساقتاۋ ۆيتسە- ءمينيسترى ۆياچەسلاۆ دۋدنيك وتاندىق وقۋشىلاردىڭ دەنساۋلىعىنا قاتىستى باستى پاتولوگيالاردى اتادى، دەپ حابارلايدى قازاقپارات ءتىلشىسى.

«مەكتەپ وقۋشىلارى ەلىمىزدەگى بارلىق بالالاردىڭ جارتىسىنا جۋىعىن قۇرايدى. سوندىقتان مەكتەپ مەديتسيناسى ءبىز ءۇشىن ماڭىزدى. ءار مەكتەپ ورنالاسقان اۋماعىندا قىزمەت كورسەتەتىن ەمحاناعا بەكىتىلگەن. بۇگىنگى تاڭدا مەكتەپتەردە 6500 مەديتسينالىق پۋنكت جۇمىس ىستەپ تۇر. ولاردا 7 مىڭعا جۋىق مەكتەپ مەدبيكەسى ەڭبەك ەتىپ جاتىر»، - دەدى ۆياچەسلاۆ دۋدنيك ورتالىق كوممۋنيكاتسيالار قىزمەتى الاڭىندا وتكەن بريفينگتە.

سونداي- اق، ۆيتسە- مينيستر مەكتەپ وقۋشىلارىنىڭ دەنساۋلىعىنا قاتىستى پاتولوگيالاردى اتادى.

«وقۋشىلار اراسىنداعى ءبىرىنشى ماسەلە كورۋ قابىلەتىنىڭ بۇزىلۋى، ەكىنشى كەزەكتە ورتالىق جۇيكە جۇيەسىنىڭ پاتولوگياسى، ال ءۇشىنشى ورىندا دەنەسىن تىك ۇستاۋ ماسەلەسى. سەمىزدىكتە وقۋشىلار اراسىندا ماڭىزدى ماسەلە بولىپ وتىر. دەنساۋلىق ساقتاۋ مينيسترلىگى ءتاتتى ءارى گازدالعان سۋسىندارعا اكتسيزدى ارتتىرۋدىڭ باستاماشىسى. اتالعان سۋسىنداردا قانت كونسەنتراتسياسى وتە جوعارى. بۇل بالالاردىڭ دەنساۋلىعىنا قاۋىپتى، ول قانت ديابەتى مەن سەمىزدىككە شالدىعۋعا الىپ كەلەدى»، - دەيدى ول.

اۆتور:

داۋلەت ىزتىلەۋ