سەنات قازاقستان مەن قاسيەتتى تاق اراسىنداعى ءوزارا قاتىناستى رەتتەيتىن زاڭدى ماقۇلدادى
سەناتور قايرات تاستەكەيەۆتىڭ اتاپ وتۋىنشە، اتالعان كەلىسىمگە ريم پاپاسى فرانسيسكتىڭ قازاقستانعا بىلتىرعى ءىسساپارى بارىسىندا قول قويىلدى. اتالعان شارت كاتوليك شىركەۋى قىزمەتشىلەرىنىڭ ساناتىن، ءتيىستى سۋبەكتىلەردى جانە قۇزىرەتتى ورگانداردى ناقتىلايدى. تۇراقتى تۇرۋ ءتارتىبى جەڭىلدەنەدى.
«اتاپ ايتقاندا، بانك شوتىندا اقشا بولۋى جانە تۇراتىن جەرىن راستاۋ تۋرالى تالاپتار الىنىپ تاستالدى. ولاردىڭ ورنىنا كاتوليك شىركەۋىنىڭ جازباشا راستاۋى جەتكىلىكتى بولادى. ناقتى ايتقاندا، شەتەلدىك ءدىن قىزمەتشىلەرى قازاقستانعا ميسسيونەرلىك ۆيزا بويىنشا 6 اي مەرزىمگە كەلە الادى جانە ونى ۇزارتۋ قۇقىعى شەكتەۋسىز بەرىلەدى. بۇگىنگى كۇنى ەلىمىزدە كاتوليك شىركەۋىنىڭ 232 شەتەلدىك ميسسيونەرى تۇرىپ جاتىر»، - دەدى سەناتور.
ونىڭ سوزىنە قاراعاندا، اتالعان ۇسىنىستار كونفەسسياارالىق كەلىسىمدى نىعايتۋعا، حالىقارالىق دەڭگەيدە ەلىمىزدىڭ قۇقىقتىق مەملەكەت رەتىندە ابىرويىن ارتتىرۋعا سەپتىگىن تيگىزەدى.
وسىدان كەيىن دەپۋتاتتار زاڭ جوباسىن ماقۇلدادى.
«بىلتىر ەلىمىزدە الەمدىك جانە ءداستۇرلى دىندەر ليدەرلەرىنىڭ VII سەزى وتكەنى بەلگىلى. سەزگە قاتىسۋ ءۇشىن قازاقستانعا الەمدىك دەڭگەيدەگى ءدىن كوشباسشىلارى كەلدى. بۇگىن ماقۇلدانعان قوسىمشا كەلىسىم ريم پاپاسى فرانسسيسكتىڭ سول كەزدەگى رەسمي ساپارى اياسىندا جاسالعان بولاتىن. الداعى ۋاقىتتا وسى قۇجات قازاقستان مەن قاسيەتتى تاق اراسىنداعى ىنتىماقتاستىقتى ودان ءارى نىعايتۋعا ءوز سەپتىگىن تيگىزەدى دەپ سەنەمىز»، - دەدى سەنات ءتوراعاسى ماۋلەن اشىمبايەۆ.
اۆتور:
مارلان جيەمباي