مەملەكەت باسشىسى وقۋشىلاردىڭ يننوۆاتسيالىق شىعارماشىلىق ورتالىعىنا باردى
ورتالىقتا وقۋشىلاردى عىلىمي- تەحنيكالىق، كوركەم- ەستەتيكالىق شىعارماشىلىققا باۋلىپ، ولاردىڭ ەكولوگيالىق- بوتانيكالىق دۇنيەتانىمىن كەڭەيتەتىن، بولاشاق ماماندىعىن تاڭداۋىنا باعىت- باعدار بەرەتىن كلۋبتار مەن ۇيىرمەلەر جۇمىس ىستەيدى.
مەملەكەت باسشىسىنا ورتالىقتاعى كاسىبي باعدارلاۋ كابينەتىنىڭ جانە اۆيامودەلدەۋ، ۆيرتۋالدى زەرتحانا، بالامالى ەنەرگيا كوزدەرى سەكىلدى ۇيىرمەلەردىڭ جۇمىسى تانىستىرىلدى.
ورتالىقتى ارالاپ كورۋ بارىسىندا مەملەكەت باسشىسى جەتكىنشەكتەرمەن اڭگىمەلەسىپ، ولاردى بۇگىنگى مەرەكەسىمەن قۇتتىقتادى. سونداي- اق بالالاردىڭ دارىنىن، قابىلەتىن دامىتۋ ءۇشىن وسىنداي ورتالىقتار وتە قاجەت ەكەنىن اتاپ ءوتتى.
پرەزيدەنت بالالار وزدەرىنە ۇناعان ىسپەن اينالىسسا، ومىردە ۇلكەن جەتىستىككە جەتەتىنىن، قوعامدا قۇرمەتتى ازامات اتاناتىنىن ايتىپ، ولارعا ساتتىلىك تىلەدى.
ءۇش قاباتتى عيماراتتا ورنالاسقان يننوۆاتسيالىق شىعارماشىلىق ورتالىقتا 1000-نان استام بالا ءبىر مەزگىلدە ءتۇرلى ۇيىرمەگە جانە سپورت سەكسياسىنا قاتىسا الادى. بۇدان بولەك، مۇندا پسيحولوگيالىق- پەداگوگيكالىق تۇزەتۋ، دەفەكتولوگ، لوگوپەد كابينەتتەرى جۇمىس ىستەيدى، سونداي- اق 300 ورىندىق كورەرمەن زالى، مەدياكورمە، ينتەراكتيۆتى ويىن جانە كوۆوركينگ الاڭدارى بار.
الماتى اكىمىنىڭ ورىنباسارى اسەم ءنۇسىپوۆا مەملەكەت باسشىسىنا قالاداعى قوسىمشا ءبىلىم بەرۋ سالاسىنىڭ دامۋى جونىندە باياندادى. ونىڭ ايتۋىنشا، قازىرگى كەزدە شاھاردا قوسىمشا ءبىلىم بەرەتىن 17 مەكەمە بار. مەكتەپ جاسىنداعى 320 مىڭ بالانىڭ تەك 10 پايىزى تەگىن ۇيىرمەلەرمەن جانە سپورت سەكسيالارىمەن قامتاماسىز ەتىلگەن. پرەزيدەنتتىڭ تاپسىرماسى بويىنشا «100 زاماناۋي وقۋشىلار سارايىن سالۋ» باعدارلاماسىن جۇزەگە اسىرۋ ماقساتىندا الاتاۋ اۋدانىندا تاعى دا وسىنداي يننوۆاتسيالىق شىعارماشىلىق ورتالىق سالىندى.
سونىمەن قاتار وسىنداي نىسانداردىڭ بالالارعا قولجەتىمدىلىگىن قامتاماسىز ەتۋ ءۇشىن تۇركسىب جانە بوستاندىق اۋداندارىندا بۇرىنعى ەسكى وقۋشىلار سارايىنىڭ ورنىنا جاڭادان دامۋ جانە شىعارماشىلىق ورتالىقتارىن سالۋ جوسپارلانعان. جالپى، قالا باسشىلىعى 2025 -جىلدىڭ سوڭىنا قاراي تەگىن قوسىمشا بىلىممەن قامتۋ كورسەتكىشىن 25 پايىزعا جەتكىزۋدى كوزدەپ وتىر.
