مەديتسينالىق «سالاماتتى قازاقستان» پويىزى التاي بەكەتىنە توقتادى

وسكەمەن. قازاقپارات - «سالاماتتى قازاقستان» مەديتسينالىق پويىزى شىعىس قازاقستان وبلىسىنداعى التاي بەكەتىنە توقتادى، دەپ حابارلايدى قازاقپارات ءتىلشىسى.

كەشە ساعات 22.15 شاماسىندا جوعارى بىلىكتى مەديتسينالىق ماماندار توپتاستىرىلعان «سالاماتتى قازاقستان» پويىزى التاي اۋدانى بىكوۆو ەلدى مەكەنىندە ورنالاسقان التاي بەكەتىنە كەلىپ توقتادى. قازاقپارات ءتىلشىسى بەكەتكە بارىپ، ولاردى ارنايى قارسى الدى.

«جاقسى جەتتىك. تاۋسامالى بەكەتىنەن كەلە جاتىرمىز. وندا ادام وتە كوپ بولدى. ءتىپتى فليۋروگرافيانىڭ وزىنەن 600-دەن استام ادام ءوتتى. جالپى مەديتسينالىق پويىز 26 -ساۋىردە الماتىدان جولعا شىققان. شىعىس قازاقستان جانە اباي وبلىستارىن 23 -مامىر مەن 12 -ماۋسىم ارالىعىندا ارالايمىز»، - دەيدى مەديتسينالىق پويىزدىڭ مەنەدجەرى ارىستان قۋاندىقوۆ.

پويىز ەرتەڭنەن باستاپ دارىگەرلەردىڭ كومەگىنە جۇگىنگىسى كەلگەن التاي اۋدانىنىڭ حالقىن قابىلدايدى. اق حالاتتىلار ەكى كۇن بويى تاڭعى ساعات 9.00-دەن كەشكى 18.00-گە دەيىن جۇمىس ىستەيدى. 13.00-14.00 ارالىعىندا تۇسكى ءۇزىلىس.

تەراپيەۆت، ستوماتولوگ، پەدياتر، وفتالمولوگ، حيرۋرگ، ۋرولوگ، لور، ماممولوگ سىندى بىلىكتى ماماندار تۇرعىنداردى ەش اقىسىز قارايدى. پويىز زاماناۋي قۇرىلعىلارمەن جابدىقتالعان. سونداي- اق شاعىن وتا بولمەسى دە بار.

اۆتور:

تالعاتجان مۇحامەتبەك ۇلى