قازاقستاندا تاكسي جۇرگىزۋشىسىنە قويىلاتىن تالاپتار وزگەرەدى
بۇيرىقتىڭ جاڭارتىلعان نۇسقاسىندا «تاكسيمەن تاسىمالداۋشى» بولىگى تولىققان. اتاپ ايتقاندا، ەندى ول جەكە تۇلعا، جولاۋشىلار مەن باگاجدى تاكسيمەن تاسىمالداۋ قىزمەتىن كورسەتەتىن دارا كاسىپكەر نەمەسە زاڭدى تۇلعا بولۋى مۇمكىن.
ايتا كەتەيىك، قولدانىستاعى بۇيىرىقتا «تاكسيمەن تاسىمالداۋشىلار» قاتارىنا جەكە تۇلعالار ەنبەيتىن.
سونىمەن بىرگە، مۇنداي ساناتتاعى تاكسي جۇرگىزۋشىلەرى قىزمەتىن باستاماس بۇرىن جەرگىلىكتى اتقارۋشى ورگانعا حابارلاما جولداۋعا مىندەتتەلەدى.
«قىزمەتتى كورسەتۋدى باستاعانعا دەيىن ينتەرنەت- پلاتفورمالاردى جانە پلاتفورمالىق جۇمىسپەن قامتۋدىڭ موبيلدىك قوسىمشالارىن پايدالانا وتىرىپ قىزمەتتەر كورسەتۋ نەمەسە جۇمىستار ورىنداۋ جونىندەگى قىزمەتتى جۇزەگە اسىراتىن جەكە تۇلعا، دارا كاسىپكەرلەر نەمەسە زاڭدى تۇلعالار اۋداندىق، وبلىستىق ماڭىزى بار قالالاردىڭ، رەسپۋبليكالىق ماڭىزى بار قالالاردىڭ، استانانىڭ جەرگىلىكتى اتقارۋشى ورگانىنا تاكسي تاسىمالداۋشىسى رەتىندە قىزمەتتىڭ باستالعانى تۋرالى حابارلاما بەرەدى»، - دەلىنگەن اشىق ن ق ا پورتالىندا جاريالانعان بۇيرىق جوباسىندا.
ەگەر قۇجاتتار تالاپقا سايكەس كەلگەن جاعدايدا ق ر ەڭبەك كودەكسىنە سايكەس، ونىمەن ەڭبەك شارتى جاسالىپ، كەيىن جۇرگىزۋشىگە جەڭىل تاكسيدى باسقارۋعا رۇقسات بەرىلەدى. الايدا، تاكسي قىزمەتىن كورسەتۋگە نيەتتى جۇرگىزۋشىنىڭ جەكە كولىگى بولماسا، وندا وعان كاسىپكەر نەمەسە زاڭدى تۇلعا جەڭىل تەمىر تۇلپار ۇسىنادى.
«جەكە تۇلعاعا دارا كاسىپكەر نەمەسە زاڭدى تۇلعا اۆتوكولىك قۇرالىن جالداۋ شارتى بويىنشا جەڭىل اۆتوموبيل ۇسىنادى. جەكە تۇلعانىڭ تالاپتاردى ساقتاۋىن باقىلاۋ جەڭىل اۆتوموبيلدىڭ يەسى بولىپ تابىلاتىن دارا كاسىپكەرگە نەمەسە زاڭدى تۇلعاعا جۇكتەلەدى»، - دەلىنگەن جاڭا رەداكسيادا.
بۇيرىقتى اشىق تالقىلاۋ 9-ماۋسىمعا دەيىن جالعاسادى.