مەملەكەت باسشىسى ۇلتتىق عىلىم اكادەمياسىنىڭ پرەزيدەنتى كۇنسۇلۋ زاكاريانى قابىلدادى

الماتى. قازاقپارات - كەزدەسۋ بارىسىندا مەملەكەت باسشىسىنا ۇلتتىق عىلىم اكادەمياسىنىڭ قىزمەتى مەن جوسپارى جونىندە ەسەپ بەرىلدى.

سونداي-اق، عىلىم سالاسىنا قاتىستى وزەكتى ماسەلەلەر تالقىلاندى، دەپ حابارلايدى قازاقپارات اقورداعا سىلتەمە جاساپ.

قاسىم-جومارت توقايەۆ جاڭا مارتەبەگە يە بولعان ۇلتتىق عىلىم اكادەمياسى وتاندىق عىلىمدى دامىتۋ ىسىندە نەگىزگى ءرول اتقارۋعا ءتيىس ەكەنىن اتاپ ءوتتى. پرەزيدەنتتىڭ پىكىرىنشە، مەملەكەتتىڭ عىلىمي-تەحنولوگيالىق جانە ەكونوميكالىق ساياساتى اراسىنداعى ءوزارا بايلانىستىڭ نىعايۋىنا باسا ءمان بەرە وتىرىپ، عىلىمدى دامىتۋدىڭ جاڭا تاسىلدەرىن قولدانۋ كەرەك. پرەزيدەنت وتاندىق عىلىمدى دامىتۋ ءۇشىن مەملەكەت قاجەتتى جاعداي جاساپ جاتقانىنا نازار اۋداردى.

پرەزيدەنت جانىنداعى عىلىم جانە تەحنولوگيالار جونىندەگى ۇلتتىق كەڭەس جۇمىس ىستەيدى. زەرتتەۋ جۇمىستارىن قارجىلاندىرۋ كولەمى ايتارلىقتاي ارتىپ، قارجىلاندىرۋ تەتىكتەرى جەتىلدىرىلدى. بۇل رەتتە مەملەكەت باسشىسى قارجىلاندىرىلىپ جاتقان عىلىمي جوبالاردىڭ وزەكتى ءارى سۇرانىسقا يە بولۋى، سونداي-اق ەكونوميكانىڭ ناقتى سەكتورلارىندا ءىس جۇزىندە قولدانىلۋى ماڭىزدى ەكەنىن اتاپ ءوتتى.

مەملەكەت باسشىسى ۇعا پرەزيدەنتى كۇنسۇلۋ زاكارياعا تالانتتى ءارى جاس عالىمداردى عىلىمي ورتاعا تارتۋ جونىندە ناقتى تاپسىرمالار بەردى. قاسىم-جومارت توقايەۆ عىلىمي ينتەلليگەنتسيانىڭ ەلىمىزدى دامىتۋعا ەلەۋلى ۇلەس قوساتىنىن اتاپ ءوتىپ، عىلىم اكادەمياسى پرەزيدەنتىنىڭ جاۋاپتى قىزمەتىنە تابىس تىلەدى.