بيىل مەكتەپ بىتىرۋشىلەر قانشا پاننەن مەملەكەتتىك ەمتيحان تاپسىرادى

استانا. قازاقپارات - كەزەكتى وقۋ جىلى اياقتالدى. ءار تۇلەكتىڭ الدىندا ومىرىندەگى ماڭىزدى قادامداردىڭ ءبىرى - قورىتىندى اتتەستاتتاۋدان ءوتۋ كۇتىپ تۇر.

ءبىلىم سالاسىندا ساپانى قامتاماسىز ەتۋ كوميتەتىنىڭ ءتوراعاسى ەرنۇر داۋەنوۆ بيىل ەمتيحان تاپسىرۋ ءراسىمى قالاي وتەتىنىن ءتۇسىندىردى، دەپ حابارلايدى قازاقپارات.

ونىڭ ايتۋىنشا، وقۋ باعدارلاماسىن مەڭگەرۋ ناتيجەسىن انىقتاۋ ءۇشىن 9- (10) سىنىپ وقۋشىلارى قورىتىندى ءبىتىرۋ ەمتيحانىن، 11- (12) سىنىپ وقۋشىلارى مەملەكەتتىك ءبىتىرۋ ەمتيحانىن تاپسىرادى.

ەمتيحاندى كوميسسيا قابىلدايدى.

ونىڭ قۇرامىنا ءپان مۇعالىمدەرى، مەكتەپ ديرەكتورىنىڭ ورىنباسارلارى، قوعامدىق ۇيىمداردىڭ جانە اتا-انالار كوميتەتىنىڭ وكىلدەرى كىرەدى.

كوميسسيانى مەكتەپ ديرەكتورى نەمەسە ونى الماستىراتىن ادام باسقارادى.

كوميسسيا مۇشەلەرىنىڭ سانى ءبىر ءبىتىرۋشى سىنىپ-كەشەن بولعان جاعدايدا كەمىندە بەس ادامنان، ال ەكى جانە ودان كوپ ءبىتىرۋشى سىنىپ-كەشەن بولسا كەمىندە جەتى ادامنان تۇرادى.

2-13- ماۋسىم ارالىعىندا 9- (10) سىنىپ وقۋشىلارى قورىتىندى ءبىتىرۋ ەمتيحانىن تاپسىرادى:

2- ماۋسىم-ەسسە نىسانىندا وقىتۋ ءتىلى بويىنشا جازباشا ەمتيحان، گۋمانيتارلىق سيكل پاندەرىن تەرەڭدەتىپ وقىتاتىن مەكتەپتەر ءۇشىن - جازباشا جۇمىس (ماقالا، اڭگىمە، ەسسە)؛

6- ماۋسىم - ماتەماتيكا (الگەبرا) بويىنشا جازباشا ەمتيحان؛

9- ماۋسىم - ورىس/وزبەك/ۇيعىر/تاجىك ءتىلدى سىنىپتاردا قازاق ءتىلى مەن ادەبيەتى بويىنشا جازباشا ەمتيحان (ماتىنمەن جۇمىس، ءماتىن بويىنشا تاپسىرمالاردى ورىنداۋ) جانە قازاق تىلىندە وقىتاتىن سىنىپتاردا ورىس ءتىلى مەن ادەبيەتى بويىنشا جازباشا ەمتيحان (ماتىنمەن جۇمىس، ءماتىن بويىنشا تاپسىرمالاردى ورىنداۋ)؛

13- ماۋسىم - تاڭداۋ ءپانى بويىنشا جازباشا ەمتيحان (فيزيكا، حيميا، بيولوگيا، گەوگرافيا، گەومەتريا، قازاقستان تاريحى، دۇنيەجۇزىلىك تاريح، ادەبيەت (وقىتۋ ءتىلى بويىنشا)، شەت ءتىلى (اعىلشىن/فرانسۋز/نەمىس)، ينفورماتيكا).

5-19- ماۋسىم ارالىعىندا 11- (12) سىنىپ وقۋشىلارى مەملەكەتتىك ءبىتىرۋ ەمتيحاندارىن تاپسىرادى:

5- ماۋسىم - وقۋ ءتىلى بويىنشا جازباشا ەمتيحان؛

8- ماۋسىم - الگەبرا جانە تالداۋ باستامالارى بويىنشا جازباشا ەمتيحان؛

12- ماۋسىم - تاريح پانىنەن اۋىزشا ەمتيحان؛

15- ماۋسىم - وزبەك/ۇيعىر/تاجىك/ورىس تىلدەرىندە وقىتاتىن مەكتەپتەردە/سىنىپتاردا قازاق ءتىلى مەن ادەبيەتى بويىنشا جانە قازاق تىلىندە وقىتاتىن مەكتەپتەردە/سىنىپتاردا ورىس ءتىلى مەن ادەبيەتى بويىنشا جازباشا ەمتيحان؛

19- ماۋسىم - تاڭداۋ ءپانى بويىنشا جازباشا ەمتيحان (فيزيكا، حيميا، بيولوگيا، گەوگرافيا، گەومەتريا، دۇنيەجۇزى تاريحى، قۇقىق نەگىزدەرى، ادەبيەت (وقىتۋ ءتىلى بويىنشا)، شەت ءتىلى (اعىلشىن/فرانسۋز/نەمىس)، ينفورماتيكا).

«ءبىتىرۋ ەمتيحاندارى قارساڭىندا قورىتىندى اتتەستاتتاۋ ەرەجەلەرى مەن نورمالارىن مۇلتىكسىز ساقتاۋدىڭ ماڭىزىن اتاپ وتكىم كەلەدى. اكادەميالىق ادالدىق قاعيداتتارىن ساقتاۋ بويىنشا مۇعالىمدەردىڭ دە، وقۋشىلاردىڭ دا ءوز كەزەگىندە جاۋاپكەرشىلىك ايماعى بار. ەمتيحاندى وبەكتيۆتى وتكىزۋ بارىسى ءبىلىم ساپاسىن ارتتىرۋعا ىقپالىن تيگىزەتىنىن ءتۇسىنۋ وتە ماڭىزدى. مەكتەپتىڭ ابىرويى، سونداي-اق ونىڭ ءبىلىم كەڭىستىگىندەگى بەدەلى تەك تسيفرلىق كورسەتكىشتەرگە عانا ەمەس، سونىمەن قاتار تۇلەكتەردىڭ ساپالى دايىندىعىنا، ولاردىڭ تەرەڭ بىلىمىنە، بىرەگەي ءبىلىم بەرۋ داستۇرىنە نەگىزدەلگەن»، - دەيدى كوميتەت ءتوراعاسى.

ونىڭ ايتۋىنشا، اكادەميالىق ادالدىق جولى ادامگەرشىلىگى جوعارى، باسەكەگە قابىلەتتى جانە جاۋاپتى قوعامنىڭ ازاماتىن قالىپتاستىرۋعا مۇمكىندىك بەرەدى.