قايرات ساتىبالدى ءىسى بويىنشا قانشا ميلليون دوللار ەلگە قايتارىلعانى ايتىلدى

استانا. قازاقپارات - سىبايلاس جەمقورلىققا قارسى ءىس-قيمىل اگەنتتىگى قايرات ساتىبالدى ۇلىنا جانە باسقا دا ادامدارعا قاتىستى جۇرگىزىلىپ جاتقان تەرگەۋ اياسىندا ەلدەن زاڭسىز شىعارىلعان اكتيۆتەردى، ونىڭ ىشىندە قىلمىستىق جولمەن الىنعان اقشا جانە وزگە دە مۇلىكتى قايتارۋ جونىندە شارا قابىلداپ جاتىر، دەپ حابارلايدى قازاقپارات انتيكورعا سىلتەمە جاساپ.

مامىر ايىنىڭ سوڭىنا قاراي سىبايلاس جەمقورلىققا قارسى قىزمەت شەت مەملەكەتتەردىڭ قۇقىق قورعاۋ ورگاندارىمەن حالىقارالىق ىنتىماقتاستىقتى قامتاماسىز ەتەتىن باس پروكۋراتۋرامەن بىرلەسىپ، بىرىككەن اراب امىرلىكتەرىنەن جالپى سوماسى 14 ميلليون ا ق ش دوللارىن قايتاردى.

اتالعان قاراجات مەملەكەت كىرىسىنە اينالدىرىلىپ، الەۋمەتتىك ماقساتتاردا پايدالانىلادى.

قىلمىستىق قۋدالاۋ باستالعاننان بەرى مەملەكەتكە زاڭسىز ساتىپ الىنعان ق. ساتىبالدى ۇلى جانە ونىمەن بايلانىستى تۇلعالاردىڭ 464 ميلليارد تەڭگەدەن استام سوماعا مۇلىكتىك اكتيۆتەرى مەن اقشالاي قاراجاتتارى قايتارىلدى.

ولارعا اكىمشىلىك عيماراتتار، ەكسكليۋزيۆتى زەرگەرلىك بۇيىمدار، ءساندى كولىكتەر، قولما-قول اقشا، اكسيالار مەن كومپانيالاردىڭ ۇلەستەرى، سونداي-اق تەمىرجول كىرەدى.

زاڭسىز شىعارىلعان اكتيۆتەردى قايتارۋ بويىنشا جۇمىس جالعاسىپ جاتىر.