20:11, 31 - مامىر 2023 | GMT +6
مەكتەپتە جوندەۋ جۇمىستارىنا اقشا جيناۋ زاڭدى ما؟ زاڭگەر جاۋاپ بەردى
استانا. قازاقپارات - كەي مەكتەپتەردە جىل سوڭىندا جوندەۋ جۇمىستارىنا نەمەسە باسقا دا قۇرىلىس جۇمىستارىنا اتا-انالاردان اقشا جينايدى. بۇل زاڭدى ما؟
ول جايلى ادۆوكات ەلنۋرا كيشكەنەبايەۆا ءوزىنىڭ ينستاگرام پاراقشاسىندا ايتتى.
ادۆوكاتتىڭ ايتۋىنشا، مەكتەپ سىزدەن قۇرىلىس جۇمىستارىنا اقشا سۇراسا، ءسىز ودان باس تارتا الاسىز.
«مەكتەپتە جىل سوڭىندا قانداي دا ءبىر قۇرىلىسقا اقشا قاراجاتىن جينايتىن بولسا، ول - قۇقىق بۇزۋشىلىق. ەگەر دە ءسىز سونداي اقپاراتتى بىلگەن بولساڭىز، قازاقستان رەسپۋبليكاسىنىڭ وقۋ-اعارتۋ مينيسترلىگىنىڭ سەنىم نومىرىنە (1450) حابارلاسىڭىز. قازاقستان رەسپۋبليكاسىنىڭ بيۋجەت كودەكسىندە كورسەتىلگەندەي، ءاربىر مەكتەپتىڭ قۇرىلىس جۇمىستارىنا اقشا قاراجاتى بولىنگەن. دەگەنمەن سىزدەن وسى قۇرىلىس جۇمىستارىنا قانداي دا ءبىر اقشا قاراجاتىن سۇرايتىن بولسا، ول – زاڭسىز»، - دەدى ەلنۋرا كيشكەنەبايەۆا.