قازاقستانداعى مەكتەپ ماسەلەسى قالاي شەشىلىپ جاتىر؟

استانا. قازاقپارات - ەلىمىزدە مەكتەپ ماسەلەسى قاشان دا وزەكتى. مەكتەپكە دەيىن جانە ورتا ءبىلىم بەرۋدى دامىتۋعا قاتىستى ءتۇرلى رەفورما جاسالىپ، ءتۇرلى جوبا قابىلدانىپ جاتادى. سونىڭ ءبىرى - «جايلى مەكتەپ» باعدارلاماسى.

ستاتيستيكا نە دەيدى؟

رەسمي ستاتيستيكا بويىنشا، بيىلعى وقۋ جىلىندا قازاقستان بويىنشا 7687 مەكتەپ بولعان. بۇل بىلتىرمەن سالىستىرعاندا 137 مەكتەپكە كوپ. بىلتىر ەل بويىنشا 7550 ءبىلىم مەكەمەسى بولعان.

ايماقتار بويىنشا، بيىلعى وقۋ جىلىندا ەڭ كوپ تۇركىستان وبلىسىنداعى مەكتەپ سانى كوپ. وڭىردە بارلىعى 1004 مەكتەپ بار. ال ودان كەيىنگى ورىندا تۇرعان اقمولا وبلىسىندا 559 مەكتەپ بار. ۇشتىكتە 501 مەكتەپپەن جامبىل وبلىسى تۇر.

ال ۇلىتاۋ وبلىسى - مەكتەپ سانى ەڭ از ءوڭىر. وبلىستا بارلىعى 88 مەكتەپ قانا بار ەكەن. بۇل وبلىس جاڭادان قۇرىلعانىمەن بايلانىستى بولۋى مۇمكىن.

مەكتەپ قالادا كوپ پە، الدە اۋىلدا كوپ پە؟

ستاتيستيكالىق دەرەكتەردى تىزەر الدىندا سپويلەر جاساساق - قازاقستاندا اۋىلدا مەكتەر سانى كوپ.

قازاقستاندا، ستاتيستيكاعا سۇيەنسەك، اۋىلداعى مەكتەپ سانى كوپ. بيىل اۋىلداردا بارلىعى 5260 مەكتەپ بولعان. ءبىر قىزىعى بىلتىر ەكى مەكتەپكە ارتىق بولعان - 5262. اۋىلداعى مەكتەپ سانى بويىنشا دا تۇركىستان وبلىسى باسىم تۇر. وبلىستاعى اۋىلداردا جالپى 842 مەكتەپ بار.

ەكىنشى ورىندا 452 مەكتەپپەن اقمولا وبلىسى. وڭىردە بىلتىر مەكتەپ سانى كوپ بولعان. 2021-2022 وقۋ جىلىندا اقمولا وبلىسىندا 466 ءبىلىم وشاعى بولعان ەكەن.

اۋىلداعى مەكتەپ سانى بويىنشا ءۇشىنشى ورىندا - 413 مەكتەپپەن الماتى وبلىسى. بۇل وڭىردە دە بيىل مەكتەپ سانى ازايعان. بىلتىرعى وقۋ جىلىندا الماتى وبلىسىندا 687 مەكتەپ بولعان.

قازاقستان قالالارىندا بارلىعى 2427 ءبىلىم وشاعى بار. بۇل بىلتىرمەن سالىستىرعاندا 139 مەكتەپكە كوپ. 2021-2022 وقۋ جىلى رەسپۋبليكا قالالارىندا بارلىعى 2288 مەكتەپ بولعان.

قالالار بويىنشا الماتى قالاسىندا مەكتەپ سانى كوپ ەكەن. شامامەن 2,2 ميلليون ادام تۇراتىن وڭتۇستىك استانادا جالپى 333 مەكتەپ بار. بىلتىرعى وقۋ جىلىندا الماتىدا بارلىعى 317 مەكتەپ بولعان.

مەكتەپ سانى بويىنشا ەكىنشى ورىندا - 1,2 ميلليون تۇرعىنى بار شىمكەنت قالاسى. ءۇشىنشى مەگاپوليستە بارلىعى 251 ءبىلىم وشاعى بار. ال مەكتەپ سانى بويىنشا ۇشتىكتى اياقتايتىن - قاراعاندى قالاسى. كومىردىڭ وتانى سانالاتىن قازاقستاننىڭڭ ورتالىعىنداعى قالادا 200 مەكتەپ بار. ءبىراق بىلتىرعى وقۋ جىلىندا قاراعاندىدا 38 مەكتەپكە ارتىق، ياعني 238 ءبىلىم مەكەمەسى بولعان.

ستاتيستيكاعا كوز شالا بايقايتىنىمىز - كەيبىر وڭىردە مەكتەپ كوپ بولسا، ەندى بىرىندە از. بۇل، ارينە، ەڭ ءبىرىنشى كەزەكتە جەرگىلىكتى تۇرعىندار سانىنا بايلانىستى بولۋى مۇمكىن.

مەكتەپ ماسەلەسى قالاي شەشىلىپ جاتىر؟

ەلىمىزدە مەكتەپ ماسەلەسى وزەكتى پروبلەمالاردىڭ ءبىرى ەكەنى بەلگىلى. وسى ولقىلىقتى شەشۋ ماقساتىندا «جايلى مەكتەپ» ۇلتتىق جوباسى قول الىنعان بولاتىن. باعدارلامانىڭ نەگىزگى ماقساتى - ءبىلىم وشاقتارىنداعى ورىن تاپشىلىعىن بولدىرماۋ، اپاتتى جاعدايدا تۇرعان جانە ءۇش اۋىسىممەن وقۋعا ءماجبۇر مەكتەپتەردىڭ ماسەلەسىن شەشۋ.

جوبا بويىنشا قولعا الىناتىن مەكتەپتەردىڭ ارتىقشىلىعى - ولار ءبىرىڭعاي ستاندارتتار بويىنشا سارالانادى. ياعني مەكتەپتەردەگى پاندەرگە ارنالعان كابينەتتەر، كومپيۋتەر سىنىپتارى، زەرتحانالاردىڭ ءبارى بىردەي ستاندارت نەگىزى بويىنشا جابدىقتالادى. «جايلى مەكتەپ» بويىنشا وقۋشىلارعا جاسالاتىن تاعى ءبىر جاعداي - ولاردىڭ سومكەسىن جەڭىلدەتۋگە جاعداي تۋادى. ياعني مەكتەپتەردە وقۋلىقتار مەن باسقا دا زاتتاردى ساقتاۋعا ارنالعان جەكە شكافتار بولادى. جوبا بويىنشا بالالارعا جاسالاتىن تاعى ءبىر جاعداي - ترانفورمەر پارتالار قويىلادى. سونىمەن قاتار، مەكتەپتىڭ ءاربىر قاباتىندا وقۋشىلار تىنىعاتىن الاڭدار بولادى.

«جايلى مەكتەپ» جوباسى بويىنشا سالىناتىن مەكتەپتەردىڭ ينتەرەرى دە زاماناۋي بولادى. ال باستاۋىش جانە جوعارى سىنىپتار بولەك بلوكتاردا ءبىلىم الادى. ءار بلوكتا جەكە اسحاناسى مەن سپورت زالى بولادى. ۇكىمەتتىڭ مالىمەتىنشە، 2023-2025-جىلدارى ءدال وسىنداي 401 مەكتەپ سالۋ جوسپارلانعان.