وڭتۇستىك كورەيا پرەزيدەنتى يۋن سوك ەل رەسمي ساپارمەن قازاقستانعا كەلەدى
بۇل تۋرالى ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ ءمالىم ەتتى، دەپ حابارلايدى قازاقپارات ءتىلشىسى.
«بۇگىن وڭتۇستىك كورەيا رەسپۋبليكاسىنىڭ سىرتقى ىستەر ءمينيسترى پاك جين مىرزامەن اشىق ءارى ناتيجەلى كەلىسسوز وتكىزدىك. ونىڭ قورىتىندىسى بويىنشا ءوزارا وزەكتى ماسەلەلەردى جان-جاقتى تالقىلاۋعا جاقسى مۇمكىندىك تۋدى دەپ ويلايمىن. وسى ورايدا مينيستر پاك جينگە جانە وڭتۇستىك كورەيا سىرتقى ىستەر مينيسترلىگىنىڭ دەلەگاتسياسىنا ەلىمىزگە رەسمي ساپارمەن كەلگەنى ءۇشىن تاعى دا العىس ايتامىن. وڭتۇستىك كورەيامەن دوستىق، ءوزارا سەنىم مەن كونسترۋكتيۆكە نەگىزدەلگەن ارىپتەستىكتى دامىتۋ - ەلىمىزدىڭ سىرتقى ساياساتىنداعى ماڭىزدى باسىمدىقتىڭ ءبىرى»، - دەدى مۇرات نۇرتىلەۋ وڭتۇستىك كورەيا رەسپۋبليكاسىنىڭ سىرتقى ىستەر ءمينيسترى پاك جيننىڭ ەلىمىزگە ساپارى بارىسىندا ۇيىمداستىرىلعان بريفينگتە.
مينيستر ەكىجاقتى سەنىمدى ارىپتەستىكتىڭ دالەلى رەتىندە مەملەكەت باسشىسى قاسىم-جومارت توقايەۆتىڭ 2021-جىلعى تامىزداعى وڭتۇستىك كورەياعا مەملەكەتتىك ساپارىن كەلتىردى.
اتالعان ساپار بارىسىندا ەكىجاقتى قارىم-قاتىناس كەڭەيتىلگەن ستراتەگيالىق ارىپتەستىك دەڭگەيىنە كوتەرىلگەن.
«سونداي-اق، ارىپتەسىممەن كەلەسى جىلى وڭتۇستىك كورەيا رەسپۋبليكاسىنىڭ پرەزيدەنتى يۋن سوك ەل مىرزانىڭ قازاقستانعا ساپارىن ۇيىمداستىرۋعا جانە ونى جوعارى دەڭگەيدە وتكىزۋگە كۇش سالامىز دەپ كەلىستىك. سونىمەن قاتار، ۇكىمەت پەن پارلامەنت مۇشەلەرىنىڭ ساپارىن وتكىزۋ ساياسي ديالوگ پەن ىقپالداستىقتى نىعايتۋ تۇرعىسىنان ماڭىزدى ەكەنى تۋرالى ورتاق پىكىر قالىپتاسقانى قۋانتارلىق جايت»، - دەدى م. نۇرتىلەۋ.