اۋدان مەن اۋىلعا جۇمىسقا بارعان ماماندارعا بەرىلەتىن جاردەماقى مولشەرى وسەدى

استانا. قازاقپارات - ەڭبەك جانە حالىقتى الەۋمەتتىك قورعاۋ مينيسترلىگى «اۋىلدىق ەلدى مەكەندەرگە جۇمىس ىستەۋ جانە تۇرۋ ءۇشىن كەلگەن ماماندارعا الەۋمەتتىك قولداۋ شارالارىن ۇسىنۋ مولشەرىن ايقىنداۋ تۋرالى» بۇيرىق-جوباسىن ازىرلەدى، دەپ حابارلايدى قازاقپارات ءتىلشىسى.

قۇجاتتا جازىلعانداي، ەندى اۋىلدىق ەلدى مەكەندەرگە جۇمىس ىستەۋ جانە تۇرۋ ءۇشىن بارعان ماماندارعا مىنا مولشەردە جاردەماقى بەرىلەدى:

- كوتەرمە جاردەماقى - 100 ا ە ك- تەن (345000 تەڭگە) اسپايدى؛

- تۇرعىن ءۇي ساتىپ الۋ نەمەسە سالۋعا الەۋمەتتىك قولداۋ ءۇشىن بيۋجەتتىك كرەديت - اۋدان ورتالىقتارىنا كەلگەن ماماندار ءۇشىن 2500 ا ە ك- تەن (8625000 تەڭگە) اسپايدى؛

- اۋىلدىق ەلدى مەكەندەرگە كەلگەن ماماندار ءۇشىن 2000 ا ە ك- تەن (6900000 تەڭگە) اسپايدى.

«وسى بۇيرىقتىڭ 1-تارماعىنىڭ 2- تارماقشاسى 2024-جىلعى 1- قاڭتارعا دەيىن مىناداي رەداكسيادا قولدانىلادى دەپ بەلگىلەنسىن:

- تۇرعىن ءۇي ساتىپ الۋ نەمەسە سالۋعا الەۋمەتتىك قولداۋ ءۇشىن بيۋجەتتىك كرەديت - 1500 ا ە ك (5175000 تەڭگە) اسپايدى»، - دەلىنگەن اشىق ن ق ا پورتالىندا جاريالانعان مينيستر بۇيرىعىندا.

ياعني، كەلەر جىلعا دەيىن اۋداندار مەن اۋىلدارعا بارعان جاس ماماندارعا ءۇي الۋ ءۇشىن 5,1 ميلليون تەڭگە بەرىلسە، 2024-جىلدىڭ 1- قاڭتارىنان باستاپ بۇل سوما اۋداندا 8,6 ميلليون، ەلدى مەكەندەردە 6,9 ميلليون تەڭگە بولىپ بەكىتىلمەك.