ءماجىلىس دەپۋتاتى زاڭسىز شىعارىلعان اكتيۆتەردى قايتارعانداردىڭ جاۋاپكەرشىلىگى تۋرالى پىكىر ءبىلدىردى
«ەگەر اكتيۆتەردى ەرىكتى تۇردە قايتارسا، وندا ءتيىستى شارت جاسالادى. وعان سايكەس اكتيۆتەرى زاڭسىز دەپ تانىلعان ادام مۇلىكتى قايتارۋ مىندەتىن ورىندايدى. بۇل جاعدايدا وعان قاتىستى قىلمىستىق قۋدالاۋ توقتايدى. ەگەر ءوز ەركىمەن قايتارسا، ودان ءارى قۋدالاۋ بولمايدى. بۇل قادامدار اكتيۆتەردى ەرىكتى تۇردە قايتارۋ تۋرالى كەلىسىمنىڭ شارتى بولادى»، - دەدى س. يماشيەۆا ماجىلىستە تىلشىلەر سۇراعىنا جاۋاپ بەرە وتىرىپ.
سونىمەن قاتار، تىلشىلەر دەپۋتاتتان زاڭسىز شىعارىلعان اكتيۆتەردىڭ قاي بولىگىن قايتارۋ مەجەسى قالاي بەلگىلەنەتىنىن سۇرادى.
«مۇنى دەپۋتاتتار مەن ۇكىمەتتىڭ قاتىسۋىمەن قۇرىلاتىن كوميسسيا شەشەدى. ماسەلەن، تۇتاس قايتارۋ پروتسەسى جۇرگەن كەزدە، جۇمىس ىستەپ تۇرعان كاسىپورىننىڭ جاعدايى ناشارلاۋى مۇمكىن. ال ەگەر بانككە قاتىستى بولسا، وندا دەپوزيتتەر مەن كاپيتال جاپپاي شىعارىلۋى ىقتيمال. بۇل ءوز كەزەگىندە ەكونوميكامىزعا ودان ءارى كەرى اسەر ەتەدى. جالپى، مەملەكەتتىڭ ەكونوميكالىق جانە الەۋمەتتىك جاعدايىنا ەلەۋلى تۇردە ىقپال ەتەتىن اكتيۆتەر بار»، - دەدى دەپۋتات.
ونىڭ ايتۋىنشا، بۇل ماسەلەگە قاتىستى ءتيىستى شەشىمدى كوميسسيا جاسايدى.
«كەيبىر نىسانداردىڭ جۇمىسىن قازىرگى يەسى ودان ءارى جالعاستىرا بەرگەنى دە دۇرىس بولادى، سەبەبى قايتارۋ پروتسەسى كەزىندە ەكونوميكا ءۇشىن اۋىر سالدار بولۋى مۇمكىن. اتاپ ايتقاندا، بۇل ماسەلە بانككە قاتىستى. بانكتە پروبلەما بار ەكەنى جاريالانسا، بىردەن دەپوزيتتەر شىعارىلاتىنى انىق. وسىنىڭ سالدارىنان كرەديتورلار قارجىلاندىرۋدى توقتاتسا، بۇل جاعداي قارجى جۇيەمىزدىڭ تۇراقسىزدىعىنا اكەلەدى. بۇل تۇرعىدا كوميسسيا اكتيۆتى قايتارۋ قادامدارىن جان-جاقتى پىسىقتايدى»، - دەدى س. يماشيەۆا.
جاقىندا پارلامەنت ءماجىلىسى زاڭسىز شىعارىلعان اكتيۆتەردى مەملەكەتكە قايتارۋ تۋرالى زاڭ جوباسى مەن بىرنەشە ىلەسپە قۇجاتتى تالقىلايدى.