مەملەكەت باسشىسى جازۋشىلار وداعىنىڭ ءتوراعاسى مەرەكە قۇلكەنوۆتى قابىلدادى
مەملەكەت باسشىسى جازۋشىلار وداعى ۇلتتىق ينتەلليگەنتسيانىڭ باسىن قوسىپ وتىرعان قارا شاڭىراق ەكەنىن ايتا كەلىپ، اقىن-جازۋشىلاردىڭ حالىق ادەبيەتىن ۇرپاقتان-ۇرپاققا جەتكىزىپ، قوعامنىڭ بىرلىگىن نىعايتۋداعى ەڭبەگى زور ەكەنىنە نازار اۋداردى. پرەزيدەنتتىڭ پىكىرىنشە، بۇگىنگى ۋاقىت تالابى باسقا. وقىرماننىڭ تالعامى، قوعامنىڭ قۇندىلىعى - بارلىعى وزگەرىپ كەلەدى. سوندىقتان، شىعارماشىلىق ورتانىڭ جۇمىسى دا بۇگىنگى زامان تالابىنا ساي بولۋى كەرەك.
قاسىم-جومارت توقايەۆ قازاق ادەبيەتىندە قازىرگى وقىرمان تالعامىنا ساي، ىزدەپ ءجۇرىپ وقيتىن قىزىق تۋىندىلار جازىلۋى كەرەك ەكەنىنە ايرىقشا توقتالدى. سونىمەن قاتار، جاس اقىن-جازۋشىلاردىڭ شىعارماشىلىعىنا ەرەكشە نازار اۋدارۋ قاجەت ەكەنىن اتاپ ءوتىپ، مەملەكەت تاراپىنان قالامگەرلەردى قولداۋ شارالارى جالعاسا بەرەتىنىن ايتتى. مەرەكە قۇلكەنوۆ پرەزيدەنتكە جازۋشىلار وداعىنىڭ جۋىردا وتكەن سەزىندە تالقىلانعان ماڭىزدى ۇسىنىستار مەن ۇيىمنىڭ الداعى جوسپارى جونىندە باياندادى. اتاپ ايتقاندا، جازۋشىلار وداعىنىڭ ءتوراعاسى پرەزيدەنتكە «مادەنيەت تۋرالى» زاڭعا قازاق جازۋشىلارىنىڭ شىعارمالارىن باسىپ شىعارۋعا جانە كەڭىنەن تاراتۋعا سەپتىگىن تيگىزەتىن ارناۋلى نورمالار ەنگىزۋ جونىندە ۇسىنىس ايتتى. سونداي-اق، قالامگەرلەرگە جان-جاقتى قولداۋ كورسەتىلىپ جاتقانى ءۇشىن پرەزيدەنتكە ريزاشىلىعىن ءبىلدىردى.