وڭتۇستىك كورەيا بالليستيكالىق زىمىران ۇشىرعان سولتۇستىك كورەيانى ايىپتادى
«بۇگىن تاڭەرتەڭ سولتۇستىك كورەيا ب ۇ ۇ قاۋىپسىزدىك كەڭەسىنىڭ قارارلارىن ايقىن بۇزىپ، سونداي-اق كورەي تۇبەگىنىڭ جانە بۇكىل الەمنىڭ بەيبىتشىلىگى مەن تۇراقتىلىعىنا قاۋىپ توندىرەتىن ەلەۋلى ارانداتۋشىلىق سانالاتىن «سپۋتنيك ۇشىرۋ» دەگەن سىلتاۋمەن ۇزاق قاشىقتىققا بالليستيكالىق زىمىران ۇشىردى. ءبىز اتالعان ەلدىڭ بۇل ءىسىن ايىپتايمىز. سولتۇستىك كورەيا كەلىسسوز ۇستەلىنە ورالادى دەگەن ءۇمىتىمىز بار»، - دەدى پاك چجين ەلىمىزگە ساپارى بارىسىندا ۇيىمداستىرىلعان باسپا ءسوز ءماسليحاتىندا.
بۇعان دەيىن ءبىرقاتار ب ا ق سولتۇستىك كورەيا ءوزىنىڭ العاشقى عارىشتىق سپۋتنيگىن وربيتاعا شىعارۋ ءۇشىن بالليستيكالىق زىمىران ۇشىرعانىن حابارلاعان ەدى.
زىمىران ۇشقاننان كەيىن كوپ ۇزاماي تەڭىزگە قۇلادى. وڭتۇستىك كورەيا اسكەريلەرى زىمىراننىڭ رادار ەكراندارىنان تەز جوعالىپ، قۇلاعانىن راستادى.
كەيىن زىمىران قالدىقتارى كورەي تۇبەگىنىڭ باتىسىنداعى سارى تەڭىزگە تۇسكەن. تالداۋعا سايكەس، زىمىران راسىمەن دە عارىشتىق سپۋتنيكتى ۇشىرۋعا ارنالعان.
ەسكە سالساق، بۇعان دەيىن وڭتۇستىك كورەيا سىرتقى ىستەر ءمينيسترىنىڭ قازاقستانعا رەسمي ساپارمەن كەلەتىنىن حابارلاعان ەدىك.
اقوردا مالىمەتىنشە، بۇگىن مەملەكەت باسشىسى قاسىم-جومارت توقايەۆتىڭ وڭتۇستىك كورەيا رەسپۋبليكاسىنىڭ سىرتقى ىستەر ءمينيسترى پاك چجينمەن كەزدەسۋى جوسپارلانعان.