ءماجىلىس ۇ ق ش ۇ اياسىندا قۇقىقتىق كومەك كورسەتۋگە قاتىستى قۇجاتتى قابىلدادى

None
استانا. قازاقپارات - بۇگىن ءماجىلىستىڭ جالپى وتىرىسىندا «ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەردىڭ اۋماعىندا ۇجىمدىق قاۋىپسىزدىك جۇيەسىنىڭ كۇشتەرى مەن قۇرالدارى قۇرالىمدارىنىڭ ۋاقىتشا بولۋىنا بايلانىستى ىستەر بويىنشا قۇقىقتىق كومەك كورسەتۋ جانە يۋريسديكتسيا ماسەلەلەرى جونىندەگى كەلىسىمدى راتيفيكاتسيالاۋ تۋرالى» زاڭى قابىلداندى، دەپ حابارلايدى قازاقپارات ءتىلشىسى.

كەلىسىمگە 2021-جىلعى 16- قىركۇيەكتە دۋشانبە قالاسىندا ۇجىمدىق كەڭەس وتىرىسىندا قول قويىلدى.

«كەلىسىمدە ۇجىمدىق قاۋىپسىزدىك جۇيەسىنىڭ كۇشتەرى قۇرامىنا كىرەتىن ادامدارعا قاتىستى قىلمىستىق ءارى اكىمشىلىك ءىس بويىنشا مەملەكەتتەردىڭ قۇزىرەتتى ورگاندارىنىڭ ىنتىماقتاستىعى تەتىگى ايقىندالعان. قۇزىرەتتى ورگانعا اسكەري باسقارۋ ورگانى، اسكەري ءبولىم كومانديرى، سوت، پروكۋراتۋرا، الدىن الا تەرگەۋ، ىشكى ىستەر، قاۋىپسىزدىك ورگانى مەن ارنايى قىزمەت جاتادى»، - دەدى قورعانىس ءمينيسترىنىڭ ورىنباسارى سۇلتان قامالەتدينوۆ.

ونىڭ ايتۋىنشا، قۇجاتتا اتالعان جۇيە كۇشتەرى قۇرامىنا كىرەتىن ادامدارعا قاتىستى تاراپتار يۋريسديكتسياسى ايقىندالعان. سونىمەن قاتار، جىبەرۋشى ەلدىڭ ادامى كەلگەن وزگە اۋماقتا قىلمىس جاساعان كەزدە، ونى تەرگەۋ ءتارتىبى بەكىتىلگەن. بۇل رەتتە پروتسەسس بارىسىنداعى شىعىندى ءار تاراپ ءوزى كوتەرەدى.

«پروتسەسس كەزىندە تاراپتاردىڭ ەگەمەندىگى مەن ۇلتتىق قاۋىپسىزدىگى ەسكەرىلەدى. سونىمەن قاتار، كەلىسىمدە وسى قۇقىقتىق كومەك مەملەكەتتىڭ ەگەمەندىگىنە نەمەسە قاۋىپسىزدىگىنە نۇقسان كەلتىرسە، ۇلتتىق زاڭناماسىنا قايشى كەلسە، ودان باس تارتىلادى دەپ بەكىتىلگەن. كەلىسىمدى راتيفيكاتسيالاۋ قازاقستان مۇددەسىنە جانە ۇيىم اياسىنداعى حالىقارالىق مىندەتتەمەگە سايكەس كەلەدى»، - دەدى ءمينيستردىڭ ورىنباسارى.

سوڭعى جاڭالىقتار