تۇركيادا جۇرگەن قازاقتاردىڭ كۇنكورىسى قيىنداپ كەتتى
قازىر تۇركيادا وقىپ، جۇمىس ىستەپ جۇرگەن قازاقستاندىقتار كۇنكورىستىڭ قيىنداپ كەتكەنىن ايتادى. ويتكەنى قاراپايىم ازىق-تۇلىكتىڭ ءوزى بىلتىردان بەرى ەكى ەسە شارىقتاعان دەپ حابارلادى turkystan.kz ك ت ك ارناسىنا سىلتەمە جاساپ.
«ليردىڭ بۇلاي قۇنسىزدانۋىنا رەجەپ ەردوعاننىڭ اقشا- نەسيە ساياساتىن دۇرىس جۇرگىزبەۋىنەن»، - دەيدى حالىقارالىق ساراپشىلار. ينفلياتسيا ءوسىپ، ال بازالىق مولشەرلەرمە سول قالپى. قارجى داعدارىسىنىڭ الدىندا تۇر دەگەن انادولىعا دەمالۋعا باراتىن وتانداستارىمىزدىڭ سانى دا كۇرت ازايعان. كەشە رەجەپ تايىپ ەردوعاننىڭ پرەزيدەنت سايلاۋىندا جەڭىسكە جەتكەنى سول ەدى، ليردىڭ قۇنسىزدانۋى رەكورد كورسەتكىشكە جەتتى. قازىر 20 ليرعا ءبىر دوللار كەلەدى. شەتەلدىك اقپارات قۇرالدارى تۇرىك ۆاليۋتاسىنىڭ ءالى دە قۇنسىزداناتىنىن ازىردەن بولجاپ وتىر. ولاردىڭ ەسەبىنشە، جىل سوڭىنا دەيىن ءتىپتى 30 پايىزعا دەيىن قۇلدىراۋى مۇمكىن. انادولىدا وقىپ، جۇمىس ىستەپ جۇرگەن وتانداستارىمىز قازىردىڭ وزىندە كيىم-كەشەكتەن باستاپ، ازىق-تۇلىككە دەيىن ەكى ەسە شارىقتاپ كەتكەنىن ايتادى.
«ليرا قالاي ءتۇستى، ازىق-تۇلىكتىڭ باعاسى بىردەن كوتەرىلدى، ەكى ەسەگە. مىسالى، بۇرىن ءجاي عانا دۇكەننەن ازىق- تۇلىك الۋعا 100 لير كەتەتىن، قازىر 100 ليردىڭ ءوزى جەتكىلىكسىز. قازىر 200 ليرداي الىپ شىعۋ كەرەك. لير قۇلاعاننان كەيىن حالىق تا جابىرقاۋ دەسەك بولادى»، - دەيدى ستۋدەنت نۇرسۇلتان قۋانتاي.
مۇنداي وزگەرىسكە سونداعى حالىقتىڭ عانا ەمەس، ادەتتە جاز شىعا تۇركياعا ۇشا جونەلەتىن قازاقستاندىقتاردىڭ دا كوڭىلى تولماي ءجۇر. وتاندىق تۋروپەراتورلار تۇركيا كۋرورتىنا اتتانامىن دەۋشىلەردىڭ سانى بيىل كۇرت ازايدى دەيدى.
«بىلتىر وسى ۋاقىتتا جۇمىسىمىز قىزۋ بولعان. تۇركياعا باراتىنداردىڭ سانى الدەقايدا كوپ بولدى. قازىر كۇرت ازايدى. تىم-تىرىس. بىلتىر تۇركيادا ءبىر اپتا دەمالۋعا 1100-1200 دوللار كەرەك بولاتىن. بيىل 1500 دوللارعا دەيىن. ويتكەنى ول ەلدە ءبارى ەكى ەسە قىمباتتاپ كەتكەن»، - دەيدى تۋروپەراتور الەكساندر اقنازاروۆ.
وزگە مەملەكەتتەردىڭ تاجىريبەسىنە سۇيەنسەك، ىشقىنداپ بارا جاتقان ينفلياتسيانى تەجەۋ ءۇشىن بازالىق مولشەرلەمەنى كوتەرۋ كەرەك. ءبىراق ەردوعان مۇنى پايدالانباي وتىر.
«تۇركيا - ىشكى نارىعىن قامتىپ وتىرعان مەملەكەتتەردىڭ ءبىرى. قازىر ينفلياتسيا ەكسپورتتاۋشى مەملەكەتتەرگە ارتىقشىلىق بولىپ ەسەپتەلەدى. ويتكەنى ونىڭ تاۋارى سىرتقى نارىققا شىققان كەزدە، سايكەسىنشە، تاۋار باعاسى تومەندەيدى. ويتكەنى ىشكى نارىقتاعى لير تومەندەدى. سول سەبەپتى ولارعا ەش قورقىنىش جوق»، - دەيدى ەكونوميست ماقسات سەرالى.
تۇرىك ليرى كەشەگى سايلاۋدىڭ ەكىنشى كەزەڭىنەن كەيىن ءبىر كۇندە قۇلدىرامادى. وسىدان ەكى جىل بۇرىن ەردوعان ۇلتتىق ۆاليۋتا باعامىن ۇستاپ تۇرا الماعانى ءۇشىن ەلدىڭ قارجى ءمينيسترىن ورنىنان الىپ تاستاعان. ءبىراق تۇيتكىل سول كۇيى تارقاتىلماي، ودان بەتەر ۋشىعىپ كەتكەنىن كورىپ وتىرمىز. تۇركيانىڭ ەندى كەلەسى قادامى قانداي بولماق؟ ەكونوميستەر ايتقانداي، مەملەكەتكە ءتيىمدى بولعان سوڭ، بازالىق مولشەرلەمەنى سول كۇيى قالدىرا ما، الدە تۇركيانى جاڭا ەكونوميكالىق رەفورما كۇتىپ تۇر ما؟ ونى ەندى ۋاقىت كورسەتەدى.