جىبەك ءجىپ قوسىلعان اقشا بانكنوتتار شىعارىلادى
مۇنداي قاعازداردىڭ قورعانىس قابىلەتى جوعارى بولادى، دەپ حابارلايدى قازاقپارات مەنشىكتى ءتىلشىسى.
وزبەكستان ورتالىق بانكى باسپا ءسوز قىزمەتىنىڭ مالىمەتىنشە، ادىلەت مينيسترلىگى تابيعي جىبەك تالشىقتارى قوسىلعان قورعالعان قاعازدى جاساۋ بويىنشا ونەرتابىسقا پاتەنت بەردى.
ونەرتابىس «داۆلات بەلگيسي» مەملەكەتتىك ۋنيتارلىق كاسىپورنىنىڭ، «وزبەكيپاكسانوات» بىرلەستىگىنىڭ جانە تاشكەنت توقىما جانە جەڭىل ونەركاسىپ ينستيتۋتىنىڭ ماماندارىنا تيەسىلى.
بۇل جاڭاشىلدىق باعالى قاعازدى باسقا قاعاز تۇرلەرىنەن اجىراتۋعا مۇمكىندىك بەرەدى. سەبەبى ونىڭ قورعانىس ەلەمەنتتەرىنىڭ قۇرامىنا تابيعي جىبەك تالشىقتارى قوسىلادى.
«ءوندىرىس پروتسەسىندە تابيعي جىبەك تالشىقتارى قاعاز ماسساسىنا قوسىلادى، سودان كەيىن ونى فلۋورەستسەنتتى ەرىتىندىمەن قانىقتىرادى. ۋلتراكۇلگىن ساۋلەلەرمەن جارىقتاندىرىلعان كەزدە جىبەك اقۋىزى كۇشەيتىلگەن قارا تۇسكە يە بولادى، وسىلايشا قاعازدى جاساندى قاعازداردان ايىرۋعا بولادى. قاعازعا بىردەي قالىڭدىقتاعى تابيعي جىبەكتى قوسقان كەزدە ونىڭ بەرىكتىگى بىرنەشە ەسە ارتادى»، - دەپ حابارلادى ورتالىق بانكتان.
جاڭا تەحنولوگيا بانكنوتتار، قورعالعان قۇجاتتار مەن قاعازدار وندىرىسىندە الەمدىك كوشباسشى بولىپ سانالاتىن حالىقارالىق كومپانيالاردىڭ ۇلكەن قىزىعۋشىلىعىن تۋدىردى.