كوكتەمنىڭ سوڭعى كۇنى ەلىمىزدە اۋا رايى قانداي بولادى
تەك رەسپۋبليكانىڭ سولتۇستىگى مەن وڭتۇستىك جارتىسىندا جاۋىن- شاشىنسىز اشىق كۇن رايى قالىپتاسادى. بارلىق وڭىردە ەكپىندى جەل ساقتالادى، باتىستا جانە وڭتۇستىكتە شاڭدى داۋىل تۇرسا، سولتۇستىكتە تۇمان بولجانادى.
قازاقپارات بۇل تۋرالى قازگيدرومەتكە سىلتەمە جاساپ حابارلايدى.
اتىراۋ وبلىسىنىڭ باسىم بولىگىندە، اقتوبە، ماڭعىستاۋ وبلىستارىنىڭ وڭتۇستىگىندە، قوستاناي وبلىسىنىڭ سولتۇستىگىندە جانە باتىسىندا قاتتى ىستىق بولادى.
قوستاناي وبلىسىنىڭ باسىم بولىگىندە، اقمولا، سولتۇستىك قازاقستان جانە اقتوبە وبلىستارىندا ءورتتىڭ جوعارى قاۋپى كۇتىلەدى.
قىزىلوردا وبلىسىنىڭ باسىم بولىگىندە، پاۆلودار وبلىسىنىڭ شىعىسى مەن ورتالىعىندا، اتىراۋ، قاراعاندى وبلىستارىنىڭ شىعىسىندا، ۇلىتاۋ وبلىسىنىڭ ورتالىعىندا، اباي وبلىسىنىڭ سولتۇستىگى مەن شىعىسىندا ءورتتىڭ توتەنشە جوعارى قاۋپى ساقتالادى.