07:35, 31 - مامىر 2023 | GMT +6
بالاسى ناشار باعا العان اتا- اناعا ايىپپۇل سالىنا ما
استانا. قازاقپارات - Instagram-داعى قاراعاندى جاڭالىقتارى پابليگىندە بالالارى مەكتەپتە ناشار وقيتىن اتا-انالارعا ايىپپۇل سالۋدى كوزدەيتىن «جاڭا زاڭ جوباسى» تالقىلانىپ جاتىر.
وبلىستىق ءبىلىم باسقارماسى بۇل اقپاراتقا قاتىستى تۇسىنىك بەردى، دەپ حابارلايدى قازاقپارات Stopfake سايتىنا سىلتەمە جاساپ.
انىقتالعانداي، الاڭداۋعا نەگىز جوق. ەلىمىزدە «ەكى» العان بالالارى ءۇشىن ايىپپۇل سالۋ جوسپارلانىپ جاتقان جوق.
«قولدانىستاعى زاڭنامادا بالالاردىڭ قاناعاتتانارلىقسىز باعالارى ءۇشىن اتا-انالاردىڭ جاۋاپكەرشىلىگى قاراستىرىلماعان. وسىنداي جاڭاشىلدىقتار ەنگىزىلگەن نورماتيۆتىك-قۇقىقتىق اكتىلەردىڭ جوبالارى تالقىلاۋعا شىعارىلعان جوق. قانداي دا ءبىر ءبىلىم بەرۋ رەفورمالارىن ەنگىزۋ تۋرالى ناقتى مالىمەتتەر الۋ ءۇشىن رەسمي اقپارات كوزدەرىن پايدالانۋدى ۇسىنامىز»، - دەپ حابارلادى قاراعاندى وبلىسىنىڭ ءبىلىم باسقارماسىنان.
