ەلوردادا جاس وتباسىلار اراسىندا بايقاۋ وتەدى

استانا. قازاقپارات - استانا قالاسى جاستار ساياساتى ماسەلەلەرى باسقارماسىنىڭ باسشىسى قايرات قامباروۆ جاس وتباسىلارعا ارنالعان جوبالار مەن الداعى ۋاقىتقا ارنالعان جوسپارىن ءبولىستى، دەپ حابارلايدى قازاقپارات ءتىلشىسى.

«جاس وتباسىلاردى قولداۋ جانە ولاردى كوپشىلىككە ۇلگى ەتۋ ماقساتىندا بىلتىر «ۇزدىك جاس وتباسى» بايقاۋى ۇيىمداستىرىلدى. بايقاۋ 3 كەزەڭنەن تۇردى. اتاپ ايتقاندا، شىعارماشىلىق جارىستار، زياتكەرلىك ويىندار (ۆيكتورينا) جانە قاتىسۋشىلاردىڭ بەينە ۆيزيتكاسى. ىرىكتەۋ ناتيجەسىندە فينالعا 10 وتباسى ءوتتى. بايقاۋ قورىتىندىسى بويىنشا جەڭىمپاز وتباسىلارعا تۇرمىستىق تەحنيكا جانە ەلەكترونيكا ساتىپ الۋ سەرتيفيكاتتارى تابىستالدى»، - دەدى قايرات قامباروۆ استانا قالاسىنىڭ كوممۋنيكاتسيالار قىزمەتىندە وتكەن بريفينگىدە.

باسقارما باسشىسىنىڭ مالىمدەۋىنشە، وتباسىلىق قۇندىلىقتاردى ناسيحاتتاۋ باعىتىنا ەرەكشە ءمان بەرىلىپ، كوپتەگەن جوبا جۇزەگە اسىپ جاتىر.

«جۇكتى ايەلدەرگە ارنالعان ترەنينگتەر ۇيىمداستىرىلدى. ءدارىس بارىسىندا جۇكتى ايەلدىڭ دەنەسىندەگى فيزيولوگيالىق وزگەرىستەر، جۇكتىلىك كەزىندە دۇرىس تاماقتانۋ، تاعى سول سياقتى تاقىرىپتار قوزعالدى. ترەنينگ سالا ماماندارى مەن ساراپشىلاردىڭ قاتىسۋىمەن ءوتتى»، - دەيدى ول.

سونداي-اق، سپيكەر استانالىق جاس وتباسىلارعا ارنالعان كەشەندى جوبالار بيىل دا جالعاسىن تاباتىنىن ايتتى.

ايتۋىنشا، كەشەندى ءىس-شارا 5 باعىتتان تۇرادى:

- جاس ەرلى-زايىپتىلارعا وتباسىلىق قۇندىلىقتاردى ءتۇسىندىرۋ بويىنشا سەمينارلار، ترەنينگتەر ۇيىمداستىرۋ؛

- «ۇزدىك جاس وتباسى» بايقاۋىن وتكىزۋ؛

- جاس وتباسىلار اراسىندا سالاۋاتتى ءومىر سالتىن ناسيحاتتاۋعا باعىتتالعان «كوڭىلدى ستارت» وتباسىلىق ەستافەتاسىن ۇيىمداستىرۋ؛

- وتباسىلىق زياتكەرلىك تۋرنير وتكىزۋ؛

- الەۋمەتتىك جەلىلەردە وتباسىلىق بايقاۋ جاريالاۋ.