تانىسىن پىشاقتادى دەپ كۇدىككە ىلىنگەن قوستاناي تۇرعىنى تەرەزەدەن سەكىرىپ، قازا تاپتى

قوستاناي. قازاقپارات - تانىسىن پىشاقتادى دەپ كۇدىككە ىلىنگەن قوستاناي تۇرعىنى ۇيىنە ءتارتىپ ساقشىلارى كەلگەن كەزدە 8-قاباتتىڭ تەرەزەسىنەن سەكىرىپ، قازا تاپتى، دەپ حابارلايدى قازاقپارات ءتىلشىسى پوليتسيا دەپارتامەنتىنىڭ باسپا ءسوز قىزمەتىنە سىلتەمەمەن.

«27- مامىردا بۇعان دەيىن سوتتالعان 30 جاستاعى جەرگىلىكتى تۇرعىن ۇرىس كەزىندە تانىسىن پىشاقتاعان. زارداپ شەگۋشى اۋرۋحاناعا جاتقىزىلدى. پوليتسيا قىزمەتكەرلەرى كۇدىكتى مەن ونىڭ تۇراتىن جەرىن انىقتادى. پوليتسەيلەر ونىڭ مەكەنجايىنا بارعان كەزدە كۇدىكتى 8-قاباتتىڭ تەرەزەسىنەن سەكىرىپ كەتكەن. العان جاراقاتىنان قازا تاپتى»، - دەپ ءمالىم ەتتى قوستاناي وبلىسى پوليتسيا دەپارتامەنتىنەن.

اتالعان فاكتى بويىنشا ق ر ق ك 106 جانە 105-باپتارى بويىنشا سوتقا دەيىنگى تەرگەۋ باستالدى.

«وقيعاعا كۋاگەر بولعان كۇدىكتىنىڭ اناسى پوليتسەيلەرگە ۇلىنىڭ بۇعان دەيىن سۋيتسيدتىك ارەكەتىن بايقاعانىن مالىمدەدى. سۋيتسيدتىك ارەكەتى تۋرالى بىرنەشە رەت ايتقان»، - دەپ ءتۇسىندىردى دەپارتامەنتتەن.

قازىر تەرگەۋ ءجۇرىپ جاتىر. سايكەس ساراپتاما تاعايىندالدى.