كوكشەتاۋدا ماعجان جۇمابايەۆتىڭ الاش رۋحانياتىنداعى ءرولى تالقىلاندى
كونفەرەنسياعا لاۋازىمدى مەملەكەتتىك قىزمەتكەرلەر، الىس-جاقىن وڭىرلەردىڭ عالىمدارى، ادەبيەتشىلەر، تاريحشىلار، دەپۋتاتتار، زيالى قاۋىم وكىلدەرى مەن جاستار قاتىستى.
«الاش رۋحانياتىنداعى ماعجاننىڭ ورنى مەن قىزمەتى» اتتى رەسپۋبليكالىق كونفەرەنسيانى شوقان ۋاليحانوۆ اتىنداعى كوكشەتاۋ ۋنيۆەرسيتەتىنىڭ رەكتورى مارات سىرلىبايەۆ اشىپ، جۇرگىزىپ وتىردى.
شارا اقمولا وبلىسىنىڭ اكىمى ەرمەك مارجىقپايەۆتىڭ قۇتتىقتاۋ سوزىمەن باستالدى.
كونفەرەنسيادا ءسوز العان ق ر كوركەم اكادەمياسىنىڭ اكادەميگى، تاريح عىلىمدارىنىڭ دوكتورى، پروفەسسور، ساكەن سەيفۋللين مۋزەيىنىڭ باسشىسى مارات ابسەمەتوۆ ماعجاننىڭ قازاق ادەبيەتىندەگى ءرولى جانە ەڭبەگى تۋرالى قاۋزادى.
«قازاق دالاسىندا ۇلى ادامدار كوپ. ءبىراق سولاردىڭ اراسىندا قازاق حالقىنىڭ رۋحىن كوتەرگەن ماعجاننىڭ ورنى بولەك. ول تەك قازاقتىڭ عانا ەمەس، ءبۇتىن تۇركى الەمىنىڭ اقىنى. كەشەگى ابىلاي حان، كەنەسارى، شوقان تۋعان كوكشە جەرىن ماعجان دا جىرلادى. ماعجان شىعارماشىلىعى زەرتتەلىپ، ونىڭ ولەڭدەرى ا ق ش، انگليا سياقتى ەلدەردە شىعىپ جاتىر. ءبىراق بۇل بىزگە ازدىق ەتەدى، ول تۋرالى ماسكەۋ، سانكت-پەتەربور ارحيۆتەرىندە دە قۇجاتتار بار. سونى كەڭىنەن زەرتتەۋىمىز كەرەك»، - دەدى مارات ابسەمەتوۆ.
سونىمەن بىرگە كونفەرەنسيادا فيلولوگيا عىلىمدارىنىڭ دوكتورى، پروفەسسور، ق ر ۇ ع ا اكادەميگى، الاشتانۋشى، ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ مۇشەسى ديحان قامزابەك ۇلى، قازاق تانۋ عىلىمي زەرتتەۋ ينستيتۋتىنىڭ ديرەكتورى، «قازاق تانۋ» عىلىمي جۋرنالىنىڭ باس رەداكتورى باقتىباي ءجۇمادىلدين، ش. ءۋاليحانوۆ اتىنداعى كوكشەتاۋ ۋنيۆەرسيتەتىنىڭ PhD دوكتورى ەربولات بايات ۇلى، استانا قالاسىنداعى جاستار تەاترىنىڭ تەاتر جانە كينو اكتەرى، «ماعجان. مەن جاستارعا سەنەمىن!» اتتى تاريحي تەلەحيكايادا اقىننىڭ ءرولىن سومداعان اكتەر مەيىرعات امانگەلديننىڭ باياندامالارى تىڭدالدى.
ايتا كەتسەك، بۇدان بۇرىن «اقمولا جۇلدىزدارى» وبلىستىق شىعارماشىلىق بايقاۋىنىڭ جەڭىمپازدارى ماراپاتتالعانىن جازعان ەدىك.