ءيت تىستەپ العان تانىمال بوكسشى جەكپە-جەككە شىقپاي قالۋى مۇمكىن

استانا. قازاقپارات - ءبىرىنشى ورتا سالماقتا WBO نۇسقاسى بويىنشا ۋاقىتشا چەمپيوندىق اتاققا يە اۋستراليالىق تيم تسزيۋ (22-0، 16 ك و) الداعى جەكپە-جەگىنە شىقپاي قالۋى مۇمكىن. ونى دەمالىس كەزىندە ءيت تىستەپ العان.

بوكس كەشى 18- ماۋسىم كۇنى گولد-كوستتە (اۋستراليا) وتەدى دەپ جوسپارلانعان. تيم مەكسيكالىق كارلوس وكامپومەن (35-2، 23 ك و) جۇدىرىقتاسۋى كەرەك.

بىرەر كۇن بۇرىن تيم تسزيۋگە وتا جاسالدى. ونى دوستارىمەن دەمالىس كەزىندە وڭ قولىنىڭ بىلەگىن ءيت تىستەپ العان. بوكسشى مەن ونىڭ كومانداسى جەكپە-جەك بولارىنا سەنىمدى. الايدا ءتيمنىڭ جاراقاتىنا بايلانىستى جاتتىعۋىنا ۋاقىتشا تىيىم سالىنعان.

تيم تسزيۋ ايگىلى بوكسشى كوستيا تسزيۋدىڭ ۇلى. جىل باسىندا ابسوليۋتتى چەمپيوندىق اتاق ءۇشىن دجەرمەلل چارلومەن جۇدىرىقتاسۋى كەرەك بولعان. ول كەزدە قارسىلاسى قولىن سىندىرىپ العان ەدى.