مەكتەپكە كەلەتىندەردى وتكىزۋ تارتىبىنە قاتىستى ءتيىستى ەرەجە قابىلدانباق

استانا. قازاقپارات - بالالار قاۋىپسىزدىگىنە قاتىستى ءبىلىم بەرۋ ۇيىمدارىندا ءبىرىنشى باسشىلاردىڭ دەربەس جاۋاپكەرشىلىگى كۇشەيتىلمەك.

بۇل تۋرالى وقۋ-اعارتۋ ۆيتسە-ءمينيسترى ەدىل وسپان ايتتى، دەپ حابارلايدى قازاقپارات ءتىلشىسى.

«بالالار قاۋىپسىزدىگىن مەكتەپتە قامتاماسىز ەتۋدى ودان ءارى جەتىلدىرۋ باعىتىندا مينيسترلىك ءبىرقاتار باستامانى كوتەرىپ وتىر. ءبىلىم بەرۋ ۇيىمدارى ءبىرىنشى باسشىلارىنىڭ دەربەس جاۋاپكەرشىلىگىن كۇشەيتۋ ەسكەرىلگەن. شۇعىل ارەكەت ەتەتىن جاعدايلار بويىنشا مەكتەپ ديرەكتورىن ءتيىستى ءىس-قيمىل الگوريتمىنە وقىتۋ جۇرگىزىلەدى»، - دەدى ە. وسپان ماجىلىستە مەكتەپكە دەيىنگى جانە ورتا ءبىلىم بەرۋ ۇيىمدارىنداعى قاۋىپسىزدىك جۇيەلەرى تاقىرىبىنا ارنالعان دوڭگەلەك ۇستەل وتىرىسىندا.

ونىڭ ايتۋىنشا، ىشكى ىستەر ورگاندارىنىڭ قاتىسۋىمەن ءبىلىم بەرۋ ۇيىمدارىنىڭ قاۋىپسىزدىك جۇيەلەرىنە تۇراقتى تۇردە مونيتورينگ جۇرگىزۋ قاراستىرىلعان.

«مەكتەپكە كەلەتىندەردى وتكىزۋ تارتىبىنە قاتىستى ارنايى تيپتىك ەرەجە قابىلداۋ جانە ءتيىستى نۇسقاۋلىققا وزگەرىس ەنگىزۋ ەسكەرىلگەن»، - دەدى ۆيتسە مينيستر.

بۇدان بۇرىن حابارلانعانداي، 2020-جىلمەن سالىستىرعاندا جەدەل باسقارۋ ورتالىقتارىنا قوسىلعان ءبىلىم بەرۋ ۇيىمدارىنىڭ سانى 11 ەسەگە (2020-جىلى – 500، 2023 -جىلى 5588) ارتتى.

وقۋشىلارى كوپ جانە ءىرى قالالاردا ورنالاسقان ءبىلىم بەرۋ ۇيىمدارىندا ليتسەنزيالانعان كۇزەتتىڭ قامتاماسىز ەتىلمەۋى انىقتالدى.