ەسىرتكىمەن كۇرەستە تۇتىنۋشىلاردى ۇستاۋمەن عانا شەكتەلىپ وتىرمىز - باس پروكۋرور

استانا. قازاقپارات - ەسىرتكى قىلمىسىن جاساۋشىلاردىڭ تورتتەن ءبىرى عانا جازاعا تارتىلعان.

بۇل تۋرالى باس پروكۋرور بەرىك اسىلوۆ زاڭدىلىقتى، قۇقىقتىق ءتارتىپ پەن قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ وتىرىسىندا ايتتى، دەپ حابارلايدى قازاقپارات ءتىلشىسى.

«زاڭ ۇستەمدىگى بولماسا، ازاماتتاردىڭ قاۋىپسىزدىگى قامتاماسىز ەتىلمەسە - الەۋمەتتىك-ەكونوميكالىق دامۋدىڭ ەشبىر اكپەكتىسى ىسكە اسپايدى. بۇل تۋرالى مەملەكەت باسشىسى دا ايتتى. بۇگىندە بۇل قۇقىق قورعاۋ جۇيەسىنىڭ باستى مىندەتتەرىنىڭ ءبىرى بولىپ وتىر. جاعىمدى ديناميكا بار. زاڭ بۇزۋ فاكتىلەرىنىڭ سانى جىل سايىن ۇزدىكسىز تومەندەپ كەلەدى. قىلمىس كورسەتكىشتەرىنىڭ مەملەكەتتەر اراسىنداعى رەيتينگىندە قازاقستاننىڭ يندەكسى «قالىپتى» دەپ باعالانادى. ياعني، جالپى جاعداي باقىلاۋدا، تۇراقتى. ءبىراق بۇل ارقانى كەڭگە سالۋعا سىلتاۋ بولماۋى كەرەك»، - دەدى باس پروكۋرور.

سونداي-اق، ول ازاماتتاردىڭ قاۋىپسىزدىگىنە اسەر ەتەتىن قىلمىستاردىڭ ءبارىنىڭ الدىن الۋ جۇمىسىن كۇشەيتۋ كەرەكتىگىن ەسكە سالدى.

«مىسالى، قوعامدى سينتەتيكالىق ەسىرتكى ماسەلەسى قاتتى الاڭداتىپ وتىر. بۇل باعىتتا بەلگىلى ءبىر جۇمىس ءجۇرىپ جاتىر. ونداعان زەرتحانا جويىلدى. تاركىلەنگەن سينتەتيكا كولەمى 3 ەسە ۇلعايعان. سونداي-اق، ينتەرنەت ارقىلى جانە ەسىرتكى جاسىرۋشىلار ارقىلى مەفەدرون، «تۇز» سياقتى سينتەتيكا قارقىندى ساتىلىپ جاتىر. دەگەنمەن تىركەلگەن فاكتىلەردىڭ تورتتەن ءبىرى بويىنشا عانا ەسىرتكى قىلمىسىن جاساۋشىلار جاۋاپقا تارتىلعان. ياعني، سول باياعىداي ەسىرتكى تۇتىنۋشىلاردى ۇستاۋعا باسىمدىق بەرىلىپ كەلەدى. قۇقىق قورعاۋ ورگاندارى وكىلدەرىنىڭ ەسىرتكى ساتۋشىلارمەن سىبايلاسۋ فاكتىلەرى بار. بۇعان مەملەكەت باسشىسى دا نازار اۋدارعان بولاتىن»، - دەدى بەرىك اسىلوۆ.