مەملەكەت باسشىسى ءماجىلىس ءتوراعاسى ەرلان قوشانوۆتى قابىلدادى
اتاپ ايتقاندا، سەسسيا باستالعاننان بەرى ءماجىلىس دەپۋتاتتارىنىڭ قاراۋىندا 75 زاڭ جوباسى بولدى. ونىڭ 14 ءى قابىلدانىپ، سەناتقا جولداندى. قازىرگى ۋاقىتتا دەپۋتاتتاردىڭ قاراۋىندا ونلاين-پلاتفورمالار، زاڭسىز ساتىپ الىنعان اكتيۆتەردى قايتارۋ، «ۇلتتىق قور - بالالارعا» باستاماسىن جۇزەگە اسىرۋ، قوعامدىق باقىلاۋ، تۇرعىن ءۇي قاتىناستارىن جەتىلدىرۋ تۋرالى زاڭ جوبالارى بار.
ەرلان قوشانوۆ سايلاۋشىلارمەن جۇمىستىڭ كۇشەيتىلگەنى تۋرالى ايتتى. ازاماتتاردى قابىلداۋ، كوميتەتتەردىڭ سالالىق جانە كوشپەلى وتىرىستارى تۇراقتى وتكىزىلىپ تۇرادى. دەپۋتاتتار حالىقتىڭ وزەكتى ماسەلەلەرىنە قاتىستى ساۋالداردى ءجيى جولداي باستادى.
جۋىردا 2022-جىلعى رەسپۋبليكالىق بيۋجەتتىڭ جۇمسالۋى تۋرالى ۇكىمەتتىڭ جانە جوعارى اۋديتورلىق پالاتانىڭ ەسەبىنە قاتىستى قوعامدىق تىڭدالىم وتەدى. پرەزيدەنتكە اتالعان شاراعا دايىندىق بارىسى تۋرالى باياندالدى.
ءماجىلىس ءتوراعاسى پارلامەنتتىك ديپلوماتيا اياسىنداعى جۇمىستىڭ قورىتىندىلارى تۋرالى دا ايتتى. بۇدان بولەك، ءماجىلىس بيىل ماۋسىم ايىندا قازاقستاننىڭ ءتوراعالىعى اياسىندا ب ۇ ۇ قولداۋىمەن ۇيىمداستىرىلاتىن ورتالىق ازيا ەلدەرى ايەلدەرىنىڭ ديالوگىنىڭ ءبىرىنشى وتىرىسىن وتكىزۋگە دايىندالىپ جاتىر.