الماتى وبلىسىندا ەنەرگەتيكالىق سۋسىنداردىڭ كەسىرىنەن ەر ادام جانساقتاۋ بولىمىنە ءتۇستى
ول كەۋدە تۇسىنىڭ اۋىرسىنۋىنا شاعىمداندى، دەپ حابارلايدى قازاقپارات ءتىلشىسى.
«تۋىستارىنىڭ ايتۋىنشا، ول سوڭعى ءتورت جىلدا كۇن سايىن ەنەرگەتيكالىق سۋسىندار ىشكەن. تولىق تەكسەرۋدەن كەيىن دارىگەرلەر ناۋقاسقا سوزىلمالى جۇرەك جەتكىلىكسىزدىگى دياگنوزىن قويدى. بۇل جۇرەكتىڭ سوعۋ فۋنكتسياسى بۇزىلىپ، ورگاندار مەن تىندەرگە وتتەگىنىڭ جەتىسپەۋشىلىگىنەن زارداپ شەگەتىن جاعداي»، - دەپ حابارلادى الماتى وبلىستىق دەنساۋلىق ساقتاۋ باسقارماسىنان.
قازىر ناۋقاستىڭ جاعدايى وتە اۋىر، جانساقتاۋ بولىمىندە جاساندى تىنىس الۋ اپپاراتىندا جاتىر.
دارىگەر ەنەرگەتيكتەردىڭ قۇرامىندا كوفەيننىڭ كوپ دوزاسى بارىن ەسكە سالدى.
ايتۋىنشا، بۇل جۇرەكتىڭ اۋىر پروبلەمالارىنا اكەلۋى مۇمكىن، ال ونىڭ كومىرقىشقىل گازىنىڭ قانتپەن ۇيلەسۋى اسقازان مەن باۋىر ءۇشىن قاۋىپتى.
«ەنەرگەتيكالىق سۋسىنداردى تۇتىنۋ ارتەريالىق گيپەرتەنزياعا، ميگرەنگە، جۇرەك ريتمىنىڭ بۇزىلۋىنا، اسقازان-ىشەك جولدارىنىڭ پروبلەمالارىنا اكەلەدى. سونداي-اق، پسيحوموتورلىق قوزۋدى، تىتىركەنۋدى، ۇيقىسىزدىقتى، تاحيكارديانى، اريتميانى، قان قىسىمىنىڭ جوعارىلاۋىن تۋدىرۋى مۇمكىن»، - دەيدى كارديولوگ دارىگەر مۇحامەدجان نۇرالي ۇلى.