ە ب ر قاراجاتىنىڭ ءبىر بولىگى بۇعاتتالدى: جاماۋبايەۆ رەسەي ۇلەسىن ساتىپ الۋ جايى تۋرالى ايتتى

استانا. قازاقپارات - قارجى ءمينيسترى ەرۇلان جاماۋبايەۆ «ۇكىمەت رەسەي ۇلەسىن ساتىپ الۋ كەزىندە ەۋرازيالىق دامۋ بانكى قاراجاتىنىڭ ءبىر بولىگى بۇعاتتا تۇرعانىن ءبىلدى مە؟» دەگەن ساۋالعا جاۋاپ بەردى، دەپ حابارلايدى قازاقپارات ءتىلشىسى.

«ول كەزدە بۇعاتتالعان جوق بولاتىن. بۇل ماسەلە وتكەن جىلدان بەرى تالقىلانىپ كەلەدى. ءبارىن جەدەل شەشۋ قاجەت بولدى. دەگەنمەن، قاراجاتتىڭ ءبىر بولىگى بۇعاتتالعان. ءبىراق، قازىر ءبىز كەلىسسوز جۇرگىزىپ جاتىرمىز. بۇل جەردە ەڭ باستىسى - كەلىسسوز پروتسەسىن دۇرىس ءتۇزۋ. ويتكەنى، بانكتىڭ ءوزى سانكسيالىق تىزىمدە تۇرعان جوق. تەك بەلگىلى ءبىر قاراجات بۇعاتتالعان. بۇل بانك توڭىرەگەندى تەرىس پىكىر قالىپتاستىرۋ بولماۋ كەرەك. بانك جۇمىس ىستەپ تۇر. قازاقستاندا وتە كوپ جوبا جۇزەگە اسىرىلىپ جاتىر. ينۆەستيتسيالىق جوبالاردىڭ 40 پايىزدان استامى قازاقستانعا باعىتتالعان. سوندىقتان ءبىز ەۋرووداق بيلىگىنە دۇرلىكتىرۋدىڭ جانە ونىڭ توڭىرەگىندە سەنساتسيا جاساۋدىڭ قاجەت جوق ەكەن تۇسىندىرۋدەمىز»، - دەدى قارجى ءمينيسترى.

سونىمەن قاتار ول «رەسەي ۇلەسىن ساتىپ الۋ شىنىمەن دە ۇلكەن جوبالاردى قارجىلاندىرۋعا مۇمكىندىك بەرە مە؟» دەگەن ساۋالعا دا جاۋاپ بەرىپ ءوتتى.

«بيىل اتالعان ۇلەس مۇنان دا ۇلكەن بولادى دەپ كۇتەمىز، تەك 2022 -جىلى عانا 2 ميلليارد دوللاردان استام قارجىلاندىرۋ بولدى. شامامەن ءدال وسىنداي سوما بيىل دا بولادى. ال ول جاقتا بۇعاتتالعانى 700 ميلليون دوللارداي. بۇل كەلىسسوز پروتسەسى. ءبىز ەرووداق بيلىگىن اقشانىڭ قازاقستانعا ارنالعاندىعىنا كوزىن جەتكىزۋىمىز كەرەك»، - دەدى ەرۇلان جاماۋبايەۆ.