باعا ساياساتى جولاۋشى مۇددەسىنە ەمەس، اۋەكومپانيانىڭ تابىسىن ارتتىرۋعا جۇمىس ىستەپ وتىر - ۇكىمەت باسشىسى

استانا. قازاقپارات - باسەكەلەستىكتى قورعاۋ جانە دامىتۋ اگەنتتىگى قازىرگى باعا ساياساتى جولاۋشىلاردىڭ مۇددەسىنە ەمەس، اۆياكومپانيالاردىڭ تابىسىن ارتتىرۋ ءۇشىن جۇمىس ىستەپ وتىر دەپ سانايدى.

ۇكىمەت وتىرىسىندا پرەمەر- مينيستر ءاليحان سمايىلوۆ وسىلاي ءمالىم ەتتى، دەپ حابارلايدى قازاقپارات ءتىلشىسى.

«استانادان الماتىعا دەيىن لوۋكوستەرمەن 1,5 ساعاتتىق ۇشۋ - ەۋروپا، ا ق ش نەمەسە قىتاي ەلدەرىندەگى وسىنداي مارشرۋتتارمەن سالىستىرعاندا 2 ەسە قىمبات بولۋى مۇمكىن. باسەكەلەستىكتى قورعاۋ جانە دامىتۋ اگەنتتىگى قازىرگى باعا ساياساتى جولاۋشىلاردىڭ مۇددەسىنە ەمەس، اۆياكومپانيالاردىڭ تابىسىن ارتتىرۋ ءۇشىن جۇمىس ىستەپ وتىر دەپ سانايدى. بۇگىندە جانارماي شىعىندارىن وتەۋگە جۇمسالاتىن وتىن الىمى لوگيكا بويىنشا اۆياوتىن باعاسىنىڭ وزگەرۋىنە بايلانىستى بولۋى ءتيىس. الايدا، ول بيلەت باعاسىندا وزگەرىسسىز، ءبىر دەڭگەيدە قالىپ وتىر. سوندىقتان، باعا ساياساتىن قايتا قاراپ، اۆياتاسىمال سەرۆيسى مەن قىزمەت كورسەتۋ ساپاسىن جاقسارتۋ ءۇشىن ۇنەمى جۇمىس ىستەۋ كەرەك»، - دەپ تاپسىرما جۇكتەدى پرەمەر- مينيستر.

سونداي-اق، پرەمەر-مينيستر ءاليحان سمايىلوۆ اۋەجايلاردىڭ اينالاسىنداعى جەرلەر رەتسىز پايدالانىلىپ جاتقانىن ايتىپ، جاۋاپتى ورگانداردى سىنعا الدى.