ازىق- تۇلىكتى ىسىراپ قىلعان كورپوراتسيا باسشىسى قىزمەتىنەن بوساتىلدى

استانا. قازاقپارات - قىزىلوردا وبلىسىندا ازىق- تۇلىكتى ىسىراپ قىلعان كورپوراتسيا باسشىسى قىزمەتىنەن بوساتىلدى، دەپ حابارلايدى وبلىستىق اكىمدىكتىڭ باسپا ءسوز قىزمەتى.

وبلىس اكىمى نۇرلىبەك نالىبايەۆتىڭ توراعالىعىمەن وتكەن ماجىلىستە ازىق- تۇلىك ىسىرابىنا جول بەرگەن كورپوراتسيانىڭ جۇمىسىنا ءتيىستى باعا بەرىلدى.

ەسكە سالساق، 26 -مامىر كۇنى الەۋمەتتىك جەلىدە قوقىس پوليگونىنا توگىلگەن جارامسىز كوكونىس قالدىقتارى تۋرالى بەينەجازبا تارادى. «بايقوڭىر الەۋمەتتىك- كاسىپكەرلىك كورپوراتسياسى» اكسيونەرلىك قوعامى قالدىقتار 25 -مامىر كۇنى جويىلعانىن راستاعان بولاتىن. مۇنى «ازىق- تۇلىك ساقتالعاندا ءوز سالماعىن جوعالتادى، ول تابيعي ءوزىن- ءوزى جوعالتۋ دەپ ەسەپتەلەدى» دەپ ءتۇسىندىردى.

ايماق باسشىسى بۇل كورپوراتسيا باسشىسىنىڭ قاتەلىگى ەكەنىن، ىسىراپتىڭ الدىن الۋعا بولاتىنىن ايتتى.

«سامات نۇراحمەت ۇلى، شىنىندا، بۇل ارەكەت تۇرعىنداردىڭ اشۋ- ىزاسىن تۋعىزدى. ماسەلەنىڭ بۇرىننان بار ەكەنىن بىلە تۇرا، ماماندارىڭىزبەن بىرگە قويماداعى ونىمدەردى باسقا ماقساتقا پايدالانۋ جولدارىن قاراستىرۋ كەرەك ەدى. بۇل جۇمىس تا جاسالماعان. 126 توننا ءونىم جارامسىز بولعانشا شىرىگەنىن كۇتىپ، ونى پايداعا اسىرۋدىڭ بالاما جولدارىن ىزدەمەگەنسىزدەر. بۇل ءسىزدىڭ باسشى رەتىندە جۇمىستى ءتيىستى دەڭگەيدە ۇيلەستىرە الماعاندىعىڭىزدى كورسەتەدى. ەلگە جاناشىرلىق تانىتا المايتىن ادامدارعا ءبىزدىڭ ارامىزدا ورىن جوق»، - دەدى نۇرلىبەك ماشبەك ۇلى.

وسى جاعدايدان كەيىن «بايقوڭىر» ءا ك ك» ا ق باسقارما ءتوراعاسى سامات ەرنيازوۆ قىزمەتىنەن بوساتىلىپ، وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى تالعات دۇيسەبايەۆقا قاتاڭ سوگىس جاريالاندى.

«بيىلعى جىلى كوكونىس الدىڭعى جىلعا قاراعاندا 3 ەسە ارتىق ساتىپ الىنعانىمەن (1547,1 توننا)، جويۋ كورسەتكىشى 3 ەسە از، ياعني % 9,2- دى قۇراپ وتىر. ول الىنعان ءونىمنىڭ ساپاسىن قاداعالاعاننىڭ تالاپقا سايكەس ساقتالعانىنىڭ ناتيجەسى» ، - دەدى تالعات دۇيسەبايەۆ.

اتالعان وقيعا بويىنشا ارنايى كوميسسيا قۇرىلىپ، ءمان- جايى مۇقيات تەكسەرىلمەك. الداعى ۋاقىتتا مۇنداي جاعداي قايتالانباس ءۇشىن ءتيىستى ۇسىنىستار ازىرلەنۋى كەرەك.

ايتا كەتەيىك، قازاقستان رەسپۋبليكاسى ۇكىمەتىنىڭ قاۋلىسىنا سايكەس ازىق- تۇلىك تاۋارلارىنىڭ تىزبەسىنە الەۋمەتتىك ماڭىزى بار 19 ءتۇرلى تاۋار ەنگىزىلگەن. 2023 -جىلعى كۇزگى ونىمنەن 3 453,3 توننا اۋىل شارۋاشىلىعى ونىمدەرىن الدىن الا اقى تولەۋ شارتىمەن فورۆاردتىق ساتىپ الۋ كولەمى بەلگىلەنىپ، تۇراقتاندىرۋ قورىن تولىقتىرۋعا 901,6 ميلليون تەڭگە باعىتتالدى.