پرەزيدەنت ءسابيت مۇقانوۆ اتىنداعى قازاق سازدى-دراما تەاترىندا زيالى قاۋىم وكىلدەرىمەن كەزدەستى

پەتروپاۆل. قازاقپارات - مەملەكەت باسشىسى قاسىم-جومارت توقايەۆ سولتۇستىك قازاقستان وبلىسىنىڭ ورتالىعىندا جاڭادان بوي كوتەرگەن س. مۇقانوۆ اتىنداعى قازاق سازدى-دراما تەاترىنا باردى، دەپ حابارلايدى قازاقپارات اقورداعا سىلتەمە جاساپ.

پرەزيدەنت تەاتر عيماراتىن ارالاپ كورىپ، «ماعجان» پەساسىنان ءۇزىندى تاماشالادى.

تەاتر ديرەكتورى ءبىرجان جالعاسبايەۆ ونەر ورداسىنىڭ ۇجىمى بەرتىنگە دەيىن «ەنەرگەتيكتەر سارايىن» پانالاعانىن، وسى جىلدار ىشىندە ءتۇرلى جانردا قويىلىمدار ساحنالاپ، حالىقارالىق، رەسپۋبليكالىق بايقاۋلاردا جۇلدە العانىن جەتكىزدى. ونىڭ ايتۋىنشا، جاڭا عيماراتقا كوشكەن ۇجىم رەپەرتۋارىن جاڭارتۋعا، شەتەلدىك جانە وتاندىق ونەر ۇجىمدارىمەن شىعارماشىلىق بايلانىس ورناتۋعا مۇمكىندىك الدى.

مەملەكەت باسشىسى قىزىلجار ولكەسىنىڭ زيالى قاۋىم وكىلدەرىمەن جانە قوعام بەلسەندىلەرىمەن اڭگىمەلەستى.

«بىرلىگىمىز ءارالۋاندىقتا. بۇل - ءبىزدىڭ ەڭ باستى ۇرانىمىز ءارى ۇستانىمىمىز. قازاق بولسىن، باسقا ۇلت بولسىن - ءبارىمىز ءبىر حالىقپىز. سوندىقتان، ءبارىمىز حالقىمىزدىڭ، ەلىمىزدىڭ وركەندەۋىنە قىزمەت ەتۋىمىز كەرەك. بارشاڭىزعا باق-بەرەكە تىلەيمىن. ءبىز ءاردايىم بىرگە بولامىز. العا قادام باسۋ ءۇشىن اۋىزبىرشىلىگىمىزدى، دوستىعىمىز بەن تۇراقتىلىعىمىزدى كوزدىڭ قاراشىعىنداي ساقتاۋىمىز كەرەك. ارينە، ەلىمىزدە الەۋمەتتىك-ەكونوميكالىق جانە قوعامدىق سيپاتتاعى ماسەلەلەر بار. پروبلەماسىز ەل بولمايدى. ءتىپتى، ەڭ دامىعان، باقۋاتتى ەلدەردە دە پروبلەما بار. ەگەر ەلدە ءتارتىپ بولسا، زاڭ قاتاڭ ساقتالسا، كوزدەگەن ناتيجەگە قول جەتكىزەمىز»، - دەدى پرەزيدەنت.

پرەزيدەنت قوعام بەلسەندىلەرىمەن ەلدىڭ دامۋى جانە وسكەلەڭ ۇرپاق تاربيەسى جونىندە پىكىر الماستى.

مەملەكەت باسشىسى قازاق ادەبيەتىنىڭ جارقىن وكىلى، اقىن ماعجان جۇمابايەۆتىڭ 130 جىلدىعىن جوعارى دەڭگەيدە اتاپ ءوتۋ قاجەت ەكەنىن ايتتى.