ءبىلىم حالىقارالىق ىنتىماقتاستىققا جول اشادى: پرەزيدەنت سولتۇستىك قازاقستان ۋنيۆەرسيتەتىنە باردى

پەتروپاۆل. قازاقپارات - مەملەكەت باسشىسى قاسىم-جومارت توقايەۆ م. قوزىبايەۆ اتىنداعى سولتۇستىك قازاقستان ۋنيۆەرسيتەتىنە باردى. پرەزيدەنت ءبىلىم بەرۋ، عىلىمي-زەرتتەۋ جۇمىستارىمەن جانە جوعارى وقۋ ورنىن ودان ءارى دامىتۋ ستراتەگياسىمەن تانىستى، دەپ حابارلايدى قازاقپارات اقورداعا سىلتەمە جاساپ.

ۋنيۆەرسيتەتتە 6 مىڭنان استام ستۋدەنت وقيدى. وقۋ ورىن بازاسىندا جاڭا وقۋ-زەرتحانا كورپۋسى ىسكە قوسىلعان. وندا ستۋدەنتتەر مەن وقىتۋشىلاردىڭ ءتۇرلى تاجىريبەلەر جانە عىلىمي زەرتتەۋلەر جۇرگىزۋىنە بارىنشا جاعداي جاسالعان.

پرەزيدەنت ۇشقىشسىز باسقارىلاتىن اپپاراتتارعا ارنالعان لابوراتوريانى ارالاپ كوردى. مۇندا ستۋدەنتتەر گيس-تەحنولوگيا ارقىلى جەردى قاشىقتان زوندتاۋ دەرەكتەرىنە تالداۋ جاساۋدى ۇيرەنەدى.

سونداي-اق، قاسىم-جومارت توقايەۆقا كونفيگۋراتسياسى كۇردەلى دەتالدار الۋ جونىندەگى يننوۆاتسيالىق ادىستەر، سيمۋلياتسيالىق وقىتۋ جانە پراكتيكالىق داعدىلار ورتالىقتارى كورسەتىلدى.

«مەن بۇل سالاعا ەرەكشە ءمان بەرەمىن. اتالعان ماسەلەلەردىڭ بارىنە باسىمدىق بەرەمىز. سەبەبى، ءبىلىم، ءبىلىم مادەنيەتى بولماسا، قازاقستان ءارى قاراي دامي المايدى. جاقىندا ءبىز عىلىم اكادەمياسىنا رەفورما جۇرگىزدىك، وتە تانىمال ءارى پراكتيك عالىمدى پرەزيدەنت ەتىپ تاعايىندادىق. عىلىم جونىندەگى جوعارى كەڭەستىڭ ءبىرىنشى وتىرىسىن وتكىزدىم. تاياۋ ارادا سىزدەر دە عالىمدار مەن تاجىريبەلى مامانداردىڭ قاتارىن تولىقتىرىپ، مەملەكەتىمىزدىڭ دامۋىنا ەلەۋلى ۇلەس قوساسىزدار دەپ سانايمىن. مەن جاستارعا سەنەمىن»، - دەدى قاسىم-جومارت توقايەۆ وقىتۋشىلارمەن جانە ستۋدەنتتەرمەن اڭگىمەلەسۋ بارىسىندا.

سونداي-اق، مەملەكەت باسشىسى حالىقارالىق وزىق تاجىريبەنى ەنگىزۋ جانە ەلىمىزدە شەتەلدىك وقۋ ورىندارىنىڭ فيليالدارىن اشۋ قاجەت ەكەنىنە نازار اۋداردى.

«ءبىز جەتەكشى ۋنيۆەرسيتەتتەردى ەلىمىزدە فيليالدارىن اشۋ ءۇشىن شاقىرىپ وتىرمىز. رەسەيدىڭ تەحنيكالىق ۋنيۆەرسيتەتتەرىن ىنتىماقتاسا جۇمىس ىستەۋگە شاقىردىم. الماتىداعى قاز ۇ ۋ- دا فيزيكا-تەحنيكا جانە اتىراۋدا مۇناي-گاز سالالارى بويىنشا رەسەي ۋنيۆەرسيتەتتەرىنىڭ بولىمشەلەرى اشىلدى. جاقىندا شيان قالاسىندا بولدىم. ول جەردە دە قىتايدىڭ تەحنيكالىق باعىتتاعى جوعارى وقۋ ورىندارى ءوز فيليالدارىن ەلىمىزدە اشۋىنا مۇددەلى ەكەنىمىزدى ايتتىم. مۇنىڭ ءبارى بىزگە پايدالى. ويتكەنى، ءبىلىم حالىقارالىق ىنتىماقتاستىققا جول اشادى. بىلىمدە شەكارا بولمايدى. قارىشتاپ دامىپ كەتكەن ەلدەر بار. ارتتا قالىپ قويعان، ءبىراق وزىق مەملەكەتتەردى قۋىپ جەتۋگە تالپىناتىن ەلدەر دە بار. سوندىقتان، بۇل سالانىڭ پەرسپەكتيۆاسى زور. قازاقستان ءبىلىم سالاسىن دامىتۋ ءۇشىن الدىڭعى قاتارلى ەلدەردىڭ قاتارىنا قوسىلادى دەپ ويلايمىن. مەن سىزدەرگە ۇلكەن ءۇمىت ارتامىن»، - دەدى پرەزيدەنت.