شەتەلدىڭ ءىرى كومپانيالارى قازاقستان اۋماعىندا جۇمىس ىستەۋگە كەلىپ جاتىر

استانا. قازاقپارات - شەتەل كومپانيالارى قازاقستان اۋماعىنا كوشۋ تۋرالى ۇسىنىس ايتىپ وتىر.

بۇل تۋرالى سىرتقى ىستەر ءمينيسترىنىڭ ورىنباسارى الماس ايداروۆ ءمالىم ەتتى، دەپ حابارلايدى قازاقپارات ءتىلشىسى.

«رەسەي فەدەراتسياسىنان كەتەتىنىن رەسمي تۇردە جاريالاعان كومپانيالاردى كوشىرۋ بويىنشا اۋقىمدى جۇمىستار ەسكەرىلگەن. قازىرگى كەزدە ءبىز قازاقستانعا كوشىرۋ باعىتىندا 401 كومپانياعا شاقىرتۋ جولدادىق. ءبىزدىڭ ەلشىلەر كومپانيا باسشىلارىمەن پىكىر الماسىپ جاتىر. وسى ورايدا، 67 كومپانيا كەلىسىپ، وزدەرىنىڭ وڭ جاۋاپتارىن بەردى. بۇلار بويىنشا ءتيىستى جۇمىستار جالعاسىپ جاتىر. ال، 25 كومپانيا كوشىرۋ جۇمىستارىن اياقتادى»، - دەدى ا. ايداروۆ سەناتتا قازاقستاننىڭ ينۆەستيتسيالىق احۋالى تارتىمدىلىعى تاقىرىبىندا ءوتىپ جاتقان ۇكىمەت ساعاتىندا.

ونىڭ ايتۋىنشا، كومپانيالاردى قازاقستانعا كوشىرۋ باعىتىندا 38 مەملەكەت قاتىسىپ وتىر. ولار نەگىزىنەن گەرمانيا، ا ق ش، شۆەيتساريا جانە جاپونيا سەكىلدى ەلدەرگە قاتىستى.

«كوشىپ كەلگەن نەگىزگى كاسىپورىندارعا توقتالساق، ا ق ش- تىڭ Honeywell كومپانياسى الماتىدا شاعىن ءوندىرىس اشتى. تانىمال Tiktok كەڭسەسىن قازاقستانعا كوشىردى، Indriver دە قازاقستاندا. اۆستراليانىڭ Fortescue كومپانياسى، فرانسيانىڭ Alstom كومپانياسى، سونداي-اق OZON استانادا لوگيستيكالىق پارك اشادى»، - دەدى ءمينيستردىڭ ورىنباسارى.

بۇدان بۇرىن حابارلانعانداي، قازاقستاندا شەتەلدىك ينۆەستيتسيانىڭ باسىم بولىگى شيكىزات سەكتورىنا باعىتتالىپ جاتىر.

ۇلتتىق ەكونوميكا ءمينيسترى الىبەك قۋانتىروۆ مۇناي مەن گاز سالاسىنا ينۆەستيتسيا وسكەنىن ايتتى.