مۇناي مەن گاز سالاسىنا ينۆەستيتسيا ارتتى - الىبەك قۋانتىروۆ

استانا. قازاقپارات - مۇناي مەن گاز سالاسىنا ينۆەستيتسيا ءوسىپ كەلەدى. بۇل تۋرالى ۇلتتىق ەكونوميكا ءمينيسترى الىبەك قۋانتىروۆ ايتتى، دەپ حابارلايدى قازاقپارات ءتىلشىسى.

ونىڭ ايتۋىنشا، الەم ەلدەرىندە ينۆەستيتسيالاردىڭ سالالىق قۇرىلىمى وزگەردى. بۇل تۇرعىدا مۇناي مەن گاز سالاسىنا ينۆەستيتسيا ءوستى. 2020-2021-جىلدارى ينۆەستيتسيا 7 ەسەدەن استام قىسقاردى. 2022-جىلى گەوساياسي جاعدايلارعا بايلانىستى مەملەكەتتەر وسى باعىتتاعى ينۆەستيتسيالاردى ۇلعايتا باستادى. ونىڭ دەڭگەيى ءىس جۇزىندە 2019-جىلعى كورسەتكىشكە دەيىن جەتتى.

«كۇردەلى سىرتقى جاعدايلارعا قاراماستان، 2022-جىلى قازاقستاندا ەكونوميكانىڭ ناقتى ءوسۋى 3,2 پايىز بولدى. 18 پايىز ءوسىمدى ەسكەرە وتىرىپ، ەلگە 28 ميلليارد ا ق ش دوللارى سوماسىندا تىكەلەي شەتەلدىك ينۆەستيتسيا تارتىلدى. بۇل كورسەتكىش 2012-جىلدان بەرى رەكوردتىق دەڭگەيدە»، - دەدى مينيستر.

ونىڭ سوزىنە قاراعاندا، نەگىزگى كاپيتالعا سالىنعان ينۆەستيتسيالار ناقتى ماندە 8 پايىزعا ءوستى. سىرتقى ساۋدا اينالىمى 32 پايىزعا ءوسىپ، 134 ميلليارد دوللار بولدى.

«جۇمىس ىستەپ تۇرعان شاعىن جانە ورتا كاسىپكەرلىك سۋبەكتىلەرىنىڭ سانى 27 پايىزعا ءوسىپ، 1,8 ميلليوننان استى. وسى سالادا جۇمىسپەن قامتىلعانداردىڭ جالپى سانى 13 پايىزعا ارتىپ، 3,9 ميلليون ادامعا جەتتى. ناتيجەسىندە، ەكونوميكاداعى شاعىن جانە ورتا بيزنەستىڭ ۇلەسى 33,5 پايىزدان 36 پايىزعا دەيىن ءوستى»، - دەدى مينيستر.

بۇدان بۇرىن حابارلانعانداي، قازاقستاندا شەتەلدىك ينۆەستيتسيانىڭ باسىم بولىگى شيكىزات سەكتورىنا باعىتتالىپ جاتىر.