شىمبۇلاق، كوكتوبە، مەدەۋ: الماتىدا قاي جەردە دەمالۋعا بولادى

الماتى. قازاقپارات - الماتى ورتا ازيانىڭ ەڭ اسەم قالالارىنىڭ ءبىرى رەتىندە مويىندالعان. الىپ شاھاردىڭ اسەم تابيعاتى مەن كوز تويماس كورىكتى جەرلەرى جانعا قۋات سىيلايدى. مادەنيەت ورداسى سانالاتىن اسەم قالادا ءتۇرلى مۇراجايلار مەن تەاترلار بار.

قازاقپارات ءتىلشىسى ساياحاتتاپ كەلگەن تۋريستەر مەن قالا قوناقتارى قاي جەرلەرگە كوبىرەك باراتىنىن انىقتاپ كوردى.

الماتى قالالىق اكىمدىگىنىڭ مالىمەتىنشە، جىل باسىنان بەرى مەگاپوليسكە 197 مىڭنان استام شەتەلدىك تۋريست كەلگەن. بۇل وتكەن جىلدىڭ سايكەس كەزەڭىمەن سالىستىرعاندا 49,3 پايىزعا ارتىق.

الماتىنىڭ كورىكتى جەرلەرى:

كوكتوبە- ىلە الاتاۋىنىڭ بوكتەرىندە ورنالاسقان كورىكتى جەرلەردىڭ ءبىرى. تەڭىز دەڭگەيىنەن 1100 م جوعارى. كوكتوبەدەن قالانىڭ كەرەمەت كورىنىسىن تاماشالاۋعا بولادى. مۇندا كەلگەن دەمالۋشىلار ءۇشىن ارنايى ءدامحانالار، ءتۇرلى ويىن- ساۋىق كەشەنى، كونسەرت زالى، اتكەنشەك، كىشىگىرىم زووباق بار. تاۋدىڭ تازا اۋاسى ادامعا ەرەكشە اسەر سىيلايدى. كوكتوبەدە بيىكتىگى 372 م تەلەۆيزيالىق مۇنارا ورنالاسقان. قالا ورتالىعىنان كوكتوبەگە اسپالى جول ارقىلى بارۋعا بولادى. اسپالى جولدىڭ ۇزىندىعى - 1620 م.

اسپالى جولمەن ءجۇرۋ قۇنى (ەكى باعىتقا) - 5000 تەڭگە. 12 جاسقا دەيىنگى بالالار ءۇشىن - 2500 تەڭگە.

ارنايى شاعىن اۆتوبۋستا جول ءجۇرۋ اقىسى - 1500 تەڭگە. 12 جاسقا دەيىنگى بالالارعا - 700 تەڭگە.

مەدەۋ - جاساندى مۇز ايدىنى بار دۇنيەجۇزىندەگى ەڭ ءىرى سپورت كەشەنى. الماتى قالاسىنان 18 شاقىرىم جەردە، كىشى الماتى شاتقالىندا، تەڭىز دەڭگەيىنەن 1691,2 م بيىكتىكتە ورنالاسقان. بۇل جەر بۇگىندە دەمالۋشىلار ءۇشىن جىلدىڭ ءتورت مەزگىلىندە دە تاپتىرماس عاجايىپ ورىن. اۋماعى 10,5 مىڭ ك م مۇزداتىلعان الاڭ قالا قوناقتارى مەن تۇرعىندارىنىڭ سىرعاناۋىنا ارنالعان. ءبىر مەزەتتە 2-3 مىڭ ادامدى قابىلدايدى. مۇندا كونكي، مانەرلەپ سىرعاناۋ، حوككەيدەن جارىستار ءوتىپ تۇرادى. سونداي- اق 842 ساتىسى بار باسپالداقپەن جوعارىعا ءمىنىپ- ءتۇسۋدىڭ ءوزى كەرەمەت سەزىم سىيلايدى.

مۇندا قالادان №12 اۆتوبۋسپەن نەمەسە تاكسيمەن جەتۋگە بولادى.

شىمبۇلاق تاۋ- شاڭعى كۋرورتى - الماتى قالاسىنىڭ ورتالىعىنان 25 شاقىرىم جەردە، ىلە الاتاۋى شاتقالىندا 2260 مەتر بيىكتىكتە ورنالاسقان. دەمالىس ورنى قىسى- جازى جۇمىس ىستەيدى. تەك جولعا شىقپاستان بۇرىن، مۇنداعى اۋا تەمپەراتۋراسى قالادان 10 گرادۋسقا تومەن بولاتىنىن ەسكەرگەن ابزال. شىمبۇلاققا جاياۋ، اسپالى جولمەن نەمەسە ارنايى تاكسيمەن جەتۋگە بولادى.

شىمبۇلاققا كوتەرىلىپ- ءتۇسۋ قۇنى ەرەسەكتەر ءۇشىن - 5000 تەڭگە، بالالارعا 1000-1500 تەڭگە.

ورتالىق دەمالىس ساياباعى - تازا اۋادا تىنىعىپ، جاقىندارىڭمەن دەمالىپ، كوڭىل كوتەرۋگە ارنالعان ورىن. مۇندا ءتۇرلى اتتراكسيون، سپورت جانە بالالار الاڭدارى جۇمىس ىستەپ تۇر. سۋعا تۇسۋگە ارنالعان اكۆاپارك تە جاز ايلارىندا دەمالۋشىلاردى كۇتەدى. مۇندا قايىقپەن، كاتامارانمەن سەرۋەندەپ، جاعالاۋدا تاماقتانۋعا بولادى.

گوركي ساياباعىنان شىقپاي- اق، ءارتۇرلى جانۋارلاردى كورىپ شىعۋعا بولادى. الماتى زووباعى 1937 -جىلى قۇرىلعان. اۋماعى - 22 گەكتار. باقتاعى جانۋارلار 6 سەكسياعا ورنالاستىرىلعان: جىرتقىش سۇتقورەكتىلەر، تۇياقتىلار، پريماتتار، قۇستار، ەكزوتاريۋم مەن اكۆاريۋم.

حايۋاناتتار باعى ساعات 10:00-دەن 19:00-گە دەيىن جۇمىس ىستەيدى. كاسسا 18:00-گە دەيىن اشىق بولادى. بالالار بيلەتى 300، ەرەسەكتەر ءۇشىن 800 تەڭگە تۇرادى. مەكەنجايى: ورمانوۆا كوشەسى 66.

ساياباققا جەتۋ وڭاي. وعان ءبىرقاتار قوعامدىق كولىك بارادى.

28 گۆارديالىق- پانفيلوۆشىلار اتىنداعى ساياباق قالانىڭ قاق ورتاسىندا ورنالاسقان. ساياباق داڭق مەموريالى جانە ماڭگى الاۋىمەن تانىمال. قالا تۇرعىندارى مەن قوناقتارى اتاقتى 316- اتقىشتار ديۆيزياسىنىڭ كومانديرى يۆان پانفيلوۆتىڭ ەسكەرتكىشىن، اۋعان سوعىسىندا قايتىس بولعان جاۋىنگەرلەرگە ارنالعان جانە وزگە دە مونۋمەنتتەردى كورە الادى. ءبىراق پارك تەك سوعىس باتىرلارىنىڭ ەسكەرتكىشتەرىمەن عانا تانىمال ەمەس. 28 پانفيلوۆشىلار پاركىنىڭ اۋماعىندا XX عاسىرعا تيەسىلى ۆوزنەسەنسكي كافەدرالىق شىركەۋى، حالىقتىق مۋزىكالىق اسپاپتار مۋزەيى جانە وفيتسەرلەر ءۇيى ءتارىزدى بىرنەشە تاريحي عيمارات ورنالاسقان. ساياباقتا فوتوعا تۇسۋگە، كەپتەرلەردى قورەكتەندىرۋگە بولادى.

اربات - باستى جاياۋ كوشە. ول ەرەكشە مادەنيەتىمەن، سۋرەتشىلەرىمەن جانە كوشە بويىنداعى سۋرەتتەرىمەن تانىمال. جاستاردىڭ ەڭ كوپ جينالاتىن جەرى دە وسى. اربات — ەستەتيكالىق تاربيە الىپ، شۋلى قالانىڭ ورتاسىندا ەركىن دەمالىپ قايتۋعا بولاتىن ورىن. مەكەنجايى: ابىلاي حان داڭعىلى مەن قونايەۆ كوشەلەرىنىڭ ارالىعى، جىبەك جولى داڭعىلى.

ۇلكەن الماتى كولى - الماتى قالاسىنان وڭتۇستىككە قاراي 15 شاقىرىم قاشىقتىقتا ورنالاسقان ىلە الاتاۋىنىڭ جوتاسىنداعى كول. تەڭىز دەڭگەيىنەن 2510 مەتر بيىكتىكتە ورنالاسقان كولدىڭ سۇلۋلىعىندا ءسوز جوق. كولدىڭ جاز مەزگىلىندەگى كورىنىسى وتە كەرەمەت. اسىرەسە، تاڭ سارىدە سۋ بەتىنە اسپان مەن ونى قورشاعان ورتا بەينەسى شاعىلىسقان كەزدە ادەمى. ادامنىڭ كوڭىلىنە ەرەكشە اسەر بەرەدى.

قازىر ول جاققا اپاراتىن جول جوندەۋگە جابىلعان. سوندىقتان جاياۋ بارۋعا تۋرا كەلەدى.

قازاقستان رەسپۋبليكاسى تۇڭعىش پرەزيدەنتىنىڭ ساياباعى ءال- فارابي- ناۋاي- ساين- دۋلاتي كوشەلەرىنىڭ اينالمالى قيىلىسىندا ورنالاسقان. الماتىداعى ەڭ ۇلكەن سۋبۇرقاق وسى ساياباقتا. جامىلعى الىپ، كىتاپ وقىپ، بادمينتون مەن فريسبي ويناپ، جاي عانا سەرگىپ قايتاتىن سۇيىكتى جەرلەردىڭ ءبىرى. تاماشا تابيعات رومانتيكالىق فوتوسەسسيا ءۇشىن دە تاپتىرماس ورىن.

باۋم توعايى - مەملەكەتتىك تابيعات ەسكەرتكىشتەرىنىڭ ءبىرى. توعاي الماتىداعى تۇركسىب اۋدانىنىڭ سەيفۋللين جانە ءسۇيىنباي داڭعىلىنىڭ قيىلىسىندا تەڭىز دەڭگەيىنەن 750 مەتر بيىكتىكتە ورنالاسقان. اۋماعى - 139, 5086 گ ا.

باۋم توعايى - الماتىنىڭ كونە ايماعى. قالا ءۇشىن ونىڭ ماڭىزى ۇلكەن. مۇنداعى قولدان جاسالعان ورمان ەكولوگيالىق، مادەني جانە ەستەتيكالىق جاعىنان دا قۇندى.

بوتانيكالىق باق. بۇل - الماتىلىقتار ەرەكشە قۇرمەتپەن قارايتىن ورىن. باقتىڭ جالپى اۋماعى - 104 گەكتار. بۇل جەردەن رەسەي، كاۆكاز، شىعىس ازيا مەن سولتۇستىك امەريكا جەرلەرىندە وسەتىن وسىمدىكتەر، اعاشتار مەن بۇتالاردى كەزدەستىرۋگە بولادى. باققا كەلۋشىلەرگە بارلىق جاعداي جاسالعان. مۇندا پيكنيك جاساۋعا بولمايدى، ول ءۇشىن ارنايى ورىندىقتار قويىلعان.

باقتىڭ ءۇش كىرەبەرىسى بار. سولتۇستىك كىرەبەرىس - تيميريازيەۆ كوشەسى، 36، باتىس كىرەبەرىس - تيميريازيەۆ، 42 جانە ءۇشىنشى ەسىك - وڭتۇستىك كىرەبەرىس. وعان ءال- فارابي داڭعىلى جاعىنان كىرۋگە بولادى.

كىرۋ اقىسى: ەرەسەكتەرگە - 850 تەڭگە، ستۋدەنتتەرگە - 685 تەڭگە، مەكتەپ وقۋشىلارى، زەينەتكەرلەر مەن ءا ا ك الۋشىلار 503 تەڭگە تولەيدى. كىشكەنتاي بالالارعا، مۇگەدەكتەر مەن ارداگەرلەرگە - تەگىن.

الماتىدا جاسقا دا، كارىگە دە بارلىق جاعداي جاسالعان.

قالادا مۋزەيلەر، كينوتەاترلار جانە ساۋدا ورتالىقتارى وتە كوپ. الۋان ءتۇرلى ءدامحانا، مەيرامحانا، كلۋب، بيليارد وينايتىن ورىندار جاقسى دەمالىس سىيلايدى.

قالادا كەشكە جانە تۇندە ءتۇرلى ءتۇستى جارق- جۇرق ەتكەن شامدار جانىپ، تاڭعالارلىق سۇلۋ كەيىپكە ەنەدى.

الماتى اكىمدىگى بەرگەن اقپارات بويىنشا، شەتەلدىك تۋريستەر مەگاپوليستە ءتورت كۇننەن ارتىق ايالدامايدى. ءبىر شەتەلدىك قوناقتىڭ ورتاشا شىعىنى - 2200 دوللار. ال وتاندىق تۋريست ءۇشىن ورتاشا چەك - 500 دوللار (بەس كۇن).

«بۇل ەكونوميكالىق ءوسىمدى كورسەتەدى. تۋريستەر جۇمساعان قاراجات قالا ەكونوميكاسىنا، سالىق، ءتۇرلى تولەمدەر مەن جالاقى ارقىلى كورىنەدى»، - دەدى اكىمدىكتەن.

اكىمدىكتىڭ مالىمەتىنشە، قالادا تۋريستىك مارشرۋتتارعا قاتىستى 10 ارنايى اقپاراتتىق پۋنكت بار. مۇندا كەڭەسشىلەر جۇمىس ىستەيدى. تۋريستەرگە اقىسىز نەگىزدە تۋريستىك كارتالار، تاۋ مارشرۋتتارىنىڭ اتلاستارى، تۋروپەراتورلاردىڭ بروشيۋرالارى، مادەني ءىس- شارالار تۋرالى حابارلاندىرۋلار جانە اقپاراتتىق سيپاتتاعى باسقا دا ماتەريالدار ۇسىنىلادى.

«قازىر تۋريستەرگە «شىمبۇلاق» تاۋ كۋرورتى، «مەدەۋ» سپورت كەشەنى، فۋرمانوۆ شىڭى مەن كوكجايلاۋ شاتقالى سياقتى تاۋلى ايماقتارعا بارۋ ۇسىنىلادى» ، - دەپ اتاپ ءوتتى ۆەدومستۆودان.

اۆتور: الما مۇقانوۆا