تەرىدەگى سۇيەل مەن پاپيللوما ونكولوگيالىق اۋرۋعا اكەلۋى مۇمكىن
دارىگەردىڭ ايتۋىنشا، قازىرگى ۋاقىتتا «تەرى قاتەرلى ىسىگىنىڭ سەبەبى نەدە؟» دەگەن سۇراققا بىردە- ءبىر جاۋاپ جوق. دەسە دە، بولجامدى بىرنەشە فاكتور بار، ولاردىڭ بولۋى ىسىكتىڭ تۋىنداۋ قاۋپىن ارتتىرادى. وعان مىنالار جاتادى: تۇقىم قۋالاۋشىلىق، قولايسىز ەكولوگيا، اسقىنعان تەرى اۋرۋلارى جانە تاعى باسقالارى.
سونىمەن قاتار مامان وبىردى ەرتە انىقتاۋ ونكولوگيالىق اۋرۋلارمەن كۇرەسۋدە ماڭىزدى ءرول اتقاراتىنىن اتاپ ءوتتى.
«بالا كەزىندە «اتوپيالىق دەرماتيت» دياگنوزى قويىلعان ادامدار بار. ءبىراق، ولار دارىگەردىڭ نۇسقاۋىن ورىندامادى: ديەتانى ۇستانبادى، سوڭىنا دەيىن ەمدەلمەدى جانە ەرەسەك كەزىندە وسى اۋرۋمەن ءومىر سۇرە بەردى. كەيىنىرەك، بۇل فوندا تەرىنىڭ قۇرعاۋى، قاتتى قىشۋ داميدى، اۋرۋ اسقىنىپ، قاتەرلى ىسىككە، ياعني وبىرعا اينالادى» ، - دەيدى دارىگەر.
ايتۋىنشا، تەرى ىسىگى كوبىنەسە وبىرالدى اۋرۋلاردىڭ اسقىنۋىنان پايدا بولادى. سوندىقتان مويىنعا، ارقاعا شىققان مەڭدەر، پاپيللومالار مەن سۇيەلدەردى مىندەتتى تۇردە الىپ تاستاتۋ كەرەك.
«ەگەر جەكە كوسمەتولوگيالىق كابينەتتە دەرماتوكوسمەتولوگ جۇمىس ىستەسە، ول الىپ تاستاۋعا قۇزىرەتتى. جويۋ ءۇشىن سۇيىق ازوت، لازەر كريوتەراپيا كىمنىڭ قانداي تەحنيكانى يەلەنەتىنىنە بايلانىستى قولدانىلادى. پروتسەدۋرادان بۇرىن АИТВ- عا قان تالداۋىن الۋ كەرەك»، - دەپ قوستى دارىگەر.
دارىگەر كۇندە كوپ جۇرۋگە بولمايتىنىن تىلگە تيەك ەتتى. سەبەبى، كۇن ساۋلەسى ءتۇرلى تەرى اۋرۋلارىن تۋدىرادى.
«تاڭەرتەڭگى ساعات 10.00-دەن 12.00-گە دەيىنگى كۇن ساۋلەسى قاۋىپتى. قىستا جانە جازدا كۇننەن قورعايتىن جاقپاماي قولدانعان ءجون. ءدارىحانادان سەرتيفيكاتتالعان ونىمدەردى ساتىپ الۋ قاجەت، ال كرەمدى قۇرعاق نەمەسە مايلى بولۋىنا بايلانىستى تەرىنىڭ تۇرىنە قاراي تاڭداۋعا بولادى»، - دەدى جاننا احمەتوۆا.
اۆتور:
الما مۇقانوۆا