شينجاڭدا تۇسىرىلگەن قازاق ومىرىنە قاتىستى كينو ەكى بىردەي ماراپاتتى ەنشىلەدى - شەتەلدەگى قازاق باسپا ءسوزى
شينجاڭدا تۇسىرىلگەن قازاق ومىرىنە قاتىستى كينو ەكى بىردەي ماراپاتتى ەنشىلەدى - CNR
قازاقتاردىڭ ومىرىنە قاتىستى «ءومىر اعىسى» اتتى كوركەم فيلم - شينجاڭ-ۇيعىر اۆتونوميالىق ولكەلىك ۇكىمەتى جانە «تيانشان» كينوستۋدياسى بىرلەسىپ تۇسىرگەن. باستى ءرولدى التاي ايماقتىق فيلارمونيانىڭ ءارتىسى مارجان بايتوكەن قىزى سومداعان. بۇل فيلم ۇرپاقتان-ۇرپاققا جالعاسقان قىستا قىستاۋعا، جازدا جايلاۋعا كوشكەن قازاق مالشىلارىنىڭ ءومىر اعىسىن باياندايدى. سونداي-اق، كينونىڭ نەگىزگى تاقىرىبى ەتنيكالىق قازاقتاردىڭ ءداستۇرلى شارۋاشىلىقتان جاڭا زامانعا بەيىمدەلۋىنە ارنالعان. اتالعان تۋىندى جاقىندا عانا قىتايدىڭ ەڭ جوعارى مارتەبەگە يە «حۋابياو» كينو فەستيۆالىندا «ۇزدىك اۋىل تاقىرىبى فيلمى» جانە «ۇزدىك فوتوسۋرەت» قاتارلى ەكى بىردەي سىيلىقتى جەڭىپ الدى، دەپ حابارلايدى قىتايدىڭ «ورتالىق حالىق راديوسى» اقپاراتتىق پورتالى.
اتالعان ب ا ق- تىڭ دەرەگىنشە، «ءومىر اعىسى» فيلمىنىڭ ءتۇسىرىلىمى ءۇش جىلعا سوزىلعان. سەبەبى قازاقتىڭ ءداستۇرلى ءومىرىن بەينەلەۋ ءۇشىن ناقتى ۋاقىتتاعى ءتۇسىرىلىم كوكتەم، جاز، كۇز جانە قىس ماۋسىمدارىن قامتۋى كەرەك بولعان. باقتاشىلاردىڭ كوشۋ پروتسەسىن كورسەتۋ ءۇشىن ءتۇسىرىلىم الاڭىنا جۇزدەگەن مىڭ مال اكەلىنگەن. جۇمىس بارىسىندا بىرنەشە رەت توتەنشە جاعدايداعى اۋا رايىنا تاپ بولعان جانە سول ءساتتى ەپيزود رەتىندە قاجەتتەرىنە پايدالانعان. ءسويتىپ، بۇل كينودا قازاقتاردىڭ قيىنشىلىعى كوپ كوشپەندى ومىردەن قايتىپ، جاڭا ومىرگە قادام باسقان كەزدەگى وقيعالارى شىنايى باياندالادى.
اتالعان ب ا ق- تىڭ كەلتىرگەن مالىمەتىنە سۇيەنسەك، فيلم سيۋجەتى ايشىقتى، كەيىپكەرلەرى جاندى، قويىلىمى كوركەم بولعان. كينوتۋىندى شىڭجاڭ تۋرالى فيلمدەردىڭ شىعارماشىلىق كوزقاراسىن، كوركەمدىك دەڭگەيىن جانە مادەني كوننوتاتسياسىن، جاڭا بيىكتەرگە قادام باسقاندىعىن ايقىن كورسەتە ءبىلدى. سوندىقتان دا اتالعان فيلم مەملەكەتتىك «حۋابياو» كينو فەستيۆالىندا ەكى جۇلدەنى قاتار جەڭىپ العان.
دارحان قىدىرالى موڭعوليا مينيسترىمەن كەزدەستى - «Kaznews»
ۇلانباتىردا قازاقستان-موڭعوليا ساۋدا-ەكونوميكالىق، عىلىمي-تەحنيكالىق جانە مادەني ىنتىماقتاستىق جونىندەگى ۇكىمەتارالىق كوميسسيانىڭ Ⅸ وتىرىسى ءوتتى. اتالعان وتىرىس شەڭبەرىندە ق ر اقپارات جانە قوعامدىق دامۋ ءمينيسترى، قازاقستان-موڭعوليا ۇكىمەتارالىق كوميسسيانىڭ تەڭ ءتوراعاسى دارحان قىدىرالى موڭعوليانىڭ ءبىلىم جانە عىلىم ءمينيسترى لۋۆسانتسەرەن ەنح-امگالانمەن كەزدەستى، دەپ حابارلايدى موڭعوليانىڭ «Kaznews» اقپاراتتىق پورتالى ق ر- نىڭ ەلشىلىگىنىڭ باسپا ءسوز قىزمەتىنە سىلتەمە جاساپ.
اقپارات كوزىنىڭ كەلتىرگەن دەرەگىنە سۇيەنسەك، د. قىدىرالى حالىقارالىق ۇيىمداردا دا تىعىز ارىپتەستىككە وراي، ەكى ەل اراسىندا ءبىلىم جانە عىلىم، اقپارات، ارحەولوگيا سالاسىندا، اسىرەسە، ورتاق مۋزەي اشۋ، كوشپەلىلەر تاريحىن بىرگە زەرتتەۋدە بىرىككەن جۇمىس ىستەۋگە نيەت بار ەكەنىن ايتقان.
سونىمەن بىرگە د. قىدىرالى مينيسترلىكتىڭ جۇمىسىنان اقپارات بەرگەن.
ءوز كەزەگىندە لۋۆسانتسەرەن ەنح-امگالان قوس مەملەكەت اراسىندا تاتۋ-ءتاتتى بايلانىس بار ەكەنىن جانە ءبىلىم، مادەنيەت، ارحەولوگيا سالاسىنداعى ورتاق جوبالار جاساۋ تۋرالى د. قىدىرالىنىڭ ۇسىنىستارىن قولدايتىنىن ايتتى.
ترانسشەكارالىق ساۋدا قىتاي-قازاقستان شەكارالاس كاسىپورىندارى مەن تۇرعىندارىنا ءتيىمدى - People.cn
200 جىلدان استام ساۋدا تاريحى بار «باقتى» وتكەلى قىتاي مەن قازاقستاننىڭ تۇيىسكەن جەرىندە ورنالاسقان. بۇل ەلىمىزدىڭ قازاقستان ءۇشىن اۋىل شارۋاشىلىعى ونىمدەرىن جىلدام كەدەندىك رەسىمدەۋگە ارنالعان العاشقى «جاسىل ارنا» جانە تۋريستىك پورت، دەپ حابارلايدى قىتايدىڭ «People.cn» اقپاراتتىق پورتالى.
اتالعان باسىلىمنىڭ دەرەگىنشە، قىتايدىڭ تارباعاتاي ايماعىنداعى «باقتى» باقىلاۋ-وتكىزۋ پۋنكتىندە تۇراتىن تۇرعىندار ءوز ۇيىندە وتىرىپ-اق بىرنەشە مينۋت ىشىندە موبيلدى قوسىمشا ارقىلى 7000 يۋاننان (شامامەن 998 ا ق ش دوللارى) اساتىن يمپورتتىق دەكلاراتسياسىن تولتىرا الادى.
ايتا كەتەيىك، 2018-جىلى شىڭجاڭ «باقتى» كەدەن بەكەتىن شەكارالاس حالىقتار اراسىنداعى ءوزارا ساۋدانى دامىتۋ ءۇشىن العاشقى پيلوتتىق پورت رەتىندە پايدالاندى. 2019-جىلدان كەيىن بۇل زاماناۋي شەكارالىق ساۋدا پورتى بولىپ رەسمي تۇردە اشىلدى.
«شەكارا ماڭىنداعى ەلدى مەكەن اراسىندا قالاارالىق ساۋدانى دامىتۋ - شەكارا اۋماعىن وركەندەتۋ جوسپارىن ىسكە اسىرۋ جانە جەرگىلىكتى حالىقتىڭ ءال- اۋقاتىن جاقسارتۋ جونىندەگى ماڭىزدى شارا بولىپ تابىلادى. سوڭعى جىلدارى شەكارالاس اۋماقتاردا تۇرعىندار كووپەراتيۆتەرىنىڭ قۇرىلۋىنا جانە ورتالىقتاندىرىلعان ونلاين دەكلاراتسيانىڭ ەنگىزىلۋىنە بايلانىستى، «باقتى» كەدەن بەكەتىنىڭ شەكارا ساۋداسى ايتارلىقتاي وزگەرىستەرگە قول جەتكىزدى»، دەپ جازادى قىتايلىق ب ا ق.
ازەربايجان مەرەكەسى استانادا تويلاندى - «TRT»
ازەربايجاننىڭ قازاقستانداعى ەلشىلىگى مەن ازەربايجان قارۋلى كۇشتەرى بىرلەسىپ قابىلداۋ وتكىزدى. ازەربايجاننىڭ 105 جىلدىعى قازاقستاندا دا اتالىپ ءوتتى، دەپ حابارلايدى تۇركيا راديو تەليەۆيزيا پورتالى.
اتالعان اقپارات كوزىنىڭ دەرەگىنە سۇيەنسەك، قازاقستاننىڭ ەلورداسى استانادا ازەربايجاننىڭ قازاقستانداعى ەلشىلىگى مەن ازەربايجان قارۋلى كۇشتەرى بىرلەسىپ قابىلداۋ وتكىزدى. قابىلداۋعا ەلدەگى ديپلوماتيالىق ميسسيالاردىڭ وكىلدەرى، ازەربايجان ازاماتتارى، قازاقستاننىڭ مەملەكەتتىك مەكەمەلەرىنىڭ وكىلدەرى، قازاقستاننىڭ سىرتقى ىستەر ءمينيسترىنىڭ ورىنباسارى جانە كوپتەگەن قوناق قاتىسقان.
شارادا قوناقتارعا ازەربايجان تاعامدارى ۇسىنىلسا، ازەربايجاننان كەلگەن مۋزىكانتتار حالىق اندەرىن شىرقادى.
يراننىڭ عىلىم ۆيتسە-ءمينيسترى الماتىداعى ج و و- دا كەزدەسۋ وتكىزدى - «Parstoday»
يراننىڭ عىلىم، زەرتتەۋ جانە تەحنولوگيا ۆيتسە-ءمينيسترى، دوكتور ۆاحيد حاددادي اسل 24- مامىر كۇنى ءال-فارابي اتىنداعى قاز ۇ ۋ مەن قازاق ۇلتتىق قىزدار پەداگوگيكالىق ۋنيۆەرسيتەتىندە كەزدەسۋ وتكىزدى، دەپ حابارلايدى «Parstoday» اقپارات اگەنتتىگى.
يراندىق ب ا ق- تىڭ مالىمەتىنە سۇيەنسەك، كەلىسسوزدەر بارىسىندا تاراپتار ەكى ەل اراسىنداعى ءبىلىم جانە عىلىم سالاسىنداعى بايلانىستاردى ارتتىرۋعا، ءال-فارابي مۇراسىن زەرتتەۋدە سەرىكتەستىك جاساۋعا مۇددەلىك تانىتتى. سونىمەن قاتار پارسى تىلىنەن بىلىكتى ماماندار دايىنداۋ تاقىرىبى دا تالقىلاندى.
دوكتور ۆاحيد حاددادي اسل ءال-فارابي اتىنداعى قاز ۇ ۋ- ءنىڭ شىعىس تانۋ فاكۋلتەتىنە بارىپ، ۇستازدارمەن كەزدەسىپ، پارسى تىلىنە قاتىستى پىكىر الماستى.
ايتا كەتەيىك، يراننىڭ عىلىم، زەرتتەۋ جانە تەحنولوگيا ۆيتسە-ءمينيسترى ءارى مينيسترلىكتىڭ حالىقارالىق عىلىمي بايلانىستار ورتالىعىنىڭ باسشىسى دوكتور ۆاحيد حاددادي اسل الماتىدا 25-26- مامىردا وتكەن يسلام ىنتىماقتاستىق ۇيىمى سامميتىنە قاتىسۋ ءۇشىن كەلگەن.
وزبەكستان مەن قازاقستان شەكاراسىنداعى ماسەلە تالقىلاندى - «ءو ز ا»
وزبەكستان مەن قازاقستان اراسىنداعى «جىبەك-جولى» شەكارالىق-كەدەندىك بەكەتىندە بايقالعان جۇك كولىكتەرىنىڭ كەپتەلىسىنە وراي تۋىنداعان ماسەلەنى شەشۋ ماقساتىندا ەكى ەلدىڭ دەلەگاتتارى كەزدەستى.
بۇل تۋرالى وسى اپتادا «ءو ز ا» اقپاراتتىق اگەنتتىگى حابارلادى.
وزبەكستاندىق باسىلىمنىڭ مالىمەتىنشە، ءور كەدەن كوميتەتى ءتوراعاسىنىڭ ءبىرىنشى ورىنباسارى يلحوم مۋحتوروۆ پەن قازاقستان رەسپۋبليكاسى قارجى مينيسترلىگى مەملەكەتتىك كىرىستەر كوميتەتى ءتوراعاسىنىڭ ورىنباسارى باقىتجان سلياموۆ، سونداي-اق قازاقستاننىڭ وزبەكستانداعى ەلشىسى بەيبىت اتامقۇلوۆ جانە ەكى ەلدىڭ شەكارالىق باقىلاۋ باسقارماسى باسشىلارى قاتىستى.
باستاپقىدا تاراپتار قازاقستاننىڭ «جىبەك- جولى» شەكارالىق-كەدەن بەكەتىندە كەلىسسوزدەر جۇرگىزىپ، وندا وسى كۇندەرى وزبەك-قازاق شەكارا بەكەتتەرىندە بايقالعان جۇك كولىكتەرىنىڭ قوزعالىسىنا باستى نازار اۋدارىلدى، دەپ جازادى وزبەكستاندىق باسىلىم.
كەزدەسۋگە قاتىسۋشىلار وزبەكستاننىڭ «گيشتكوپريك»، «ياللاما»، «سىرداريا» شەكارالىق كەدەن بەكەتتەرى، «مالىك»، «اق التىن» وتكىزۋ پۋنكتتەرى، قازاقستاننىڭ «ب. قونىسبايەۆ»، «اتامەكەن» شەكارالىق كەدەن بەكەتتەرىندە بولىپ، تۋىنداعان جاعدايدى قاراستىردى، كەپتەلىستە تۇرعان جۇرگىزۋشىلەرمەن سۇحباتتاسقان.
اۆتور: بەيسەن سۇلتان