بۇگىن تۇركيادا پرەزيدەنت سايلاۋىنىڭ شەشۋشى كەزەڭى وتەدى
سايلاۋدىڭ 14- مامىردا وتكەن العاشقى تۋرىندا 4 كانديدات باق سىناسقان بولاتىن.
ولار: قازىرگى پرەزيدەنت رەجەپ تايىپ ەردوعان، وپپوزيتسيونەرلەر كەمال قىلىشداروعلى، مۇحاررەم ينجە ءجانا سينان وعان.
دەگەنمەن نەگىزگى باسەكە بيلىك پارتياسىنىڭ اتىنان سىنعا ءتۇسىپ جاتقان رەجەپ تايىپ ەردوعان مەن ەلدەگى نەگىزگى وپپوزيتسيالىق كۇش سانالاتىن «رەسپۋبليكالىق حالىق پارتياسىنىڭ» ءتوراعاسى كەمال قىلىشداروعلى اراسىندا ءوتىپ جاتىر.
بيلىك جاعىنداعى حالىق كواليتسياسىنا «ادىلدىك جانە دامۋ پارتياسى»، «ۇلتشىل قوزعالىس پارتياسى» مەن «ۇلى بىرلىك» پارتياسى بىرىككەن.
قازىرگى پرەزيدەنت ر. ەردوعاننىڭ كانديداتۋراسىن ۇسىنعان وسى كواليتسيا.
ال وپپوزيتسيالىق باعىتتاعى «ۇلتتىق اليانس» قۇرامىنا رەسپۋبليكالىق حالىق پارتياسىنان بولەك «جاقسى» پارتياسى، «باقىت» پارتياسى مەن «دەموكراتيالىق پارتيا» كىرىپ وتىر.
وپپوزيتسيالىق كۇشتەرگە «بولاشاق پارتياسى» مەن «دەموكراتيا جانە پروگەرسس پارتياسى» دا قولداۋ كورسەتىپ كەلەدى.
وسىلايشا قازىرگى پرەزيدەنتتىڭ باستى قارسىلاسى ك. قىلىشداروعلى 6 پارتيانىڭ ۇسىنۋىمەن سايلاۋعا ارالاسقان.
14- مامىرداعى سايلاۋ ايقىن جەڭىمپازدى انىقتاي الماعان. كوش باسىنداعى ەكى ۇمىتكەر داۋىس بەرۋشىلەردىڭ 50 پايىزدان استام داۋىسىن جيناي الماي قالعان ەدى.
ال قالعان كانديداتتار بۇل ەكەۋدىڭ قارقىنىنا ىلەسە الماعان. ونىڭ ۇستىنە م. ينجە 11- مامىردا- اق ەلدىڭ تىنىشتىعى ءۇشىن ءوز كانديداتۋراسىن كەرى قايتارىپ الاتىنىن مالىمدەگەن بولاتىن.
ءبىرىنشى كەزەڭدە حالىقتىڭ %5 دان استام عانا داۋسىن جيناعان س. وعان سايلاۋشىلاردى ەكىنشى كەزەڭدە ر. ەردوعانعا قولداۋ كورسەتۋگە شاقىردى.
جالپى ەلدەگى كوپتەگەن رەيتينگ جۇرگىزەتىن كومپانيا قازىرگى بيلىككە وپپوزيتسيالىق باعىتتاعى «ۇلتتىق كواليتسيانىڭ» ۇمىتكەرى كەمال قىلىشداروعلىنىڭ جەڭىسكە جەتۋگە مۇمكىندىگى مول ەكەنىن ايتىپ وتىر.
ولاردىڭ مالىمەتى بويىنشا، سايلاۋشىلاردىڭ شامامەن %53 استامى اتاتۇرىكشىلەردى قولداۋعا، قالعان بولىگى ر. ەردوعاندى قولداۋعا دايىن.
ال 14- مامىرداعى سايلاۋدىڭ رەسمي قورىتىندىسى حالىق سەنىمى قازىرگى پرەزيدەنتكە دەگەن سەنىمىن جوعالتپاعانىن كورسەتتى.
ءبىرىنشى تۋردا ر. ەردوعان %49,34، ال ك. قىلىشداروعلى %45 داۋىس جيناعان بولاتىن.
14- مامىردان كەيىن ەلدەگى سايلاۋ ناۋقانى توقتاعان جوق. قالا كوشەلەرىندە ەكى كانديداتتىڭ ۇگىت-ناسيحاتى ءالى ءجۇرىپ جاتىر.
پاراقشا تاراتىپ، داڭعىلداردا داۋىس زورايتقىشپەن ۇران تاستاۋشىلار ءجيى كوزگە شالىنادى.
بۇگىن، ياعني، 28- مامىردا تۇركيانىڭ 13-پرەزيدەنتى كىم بولاتىنى ايقىندالادى.
وسىلايشا تۇركيا رەسپۋبليكاسى ءوز تاريحىنىڭ ەكىنشى عاسىرىنا كىمنىڭ باسشىلىعىمەن قادام باساتىنى بەلگىلى بولماق.