ريمدە قازاقستاندىق ديزاينەرلەر مەن زەرگەرلەردىڭ توپتامالارى تانىستىرىلدى
وعان يتالياندىق ديزاينەرلەر، ونەرتانۋشىلار، سۋرەتشىلەر، ديپلوماتيالىق كورپۋس وكىلدەرى، جۋرناليستەر جانە ت. ب. 100 دەم اسا ادام قاتىستى.
تانىستىرىلىمنىڭ ماقساتى - يتالياندىق اۋديتوريانى ساندىك-قولدانبالى ونەردە بولىپ جاتقان ۇردىستەر ارقىلى قازاقستاننىڭ ۇلتتىق سالت-داستۇرىمەن تانىستىرۋ، سەبەبى ول كەز كەلگەن مادەنيەتتىڭ قۇرامداس بولىگى جانە قالىپتاسۋ قۇرالى بولىپ تابىلاتىن بىرەگەي تاريحتى، ءداستۇردى جانە ۇلتتىق مۇرانى بەينەلەيدى.
ءىس-شاراعا قاتىسۋشىلاردىڭ الدىندا ءسوز سويلەگەن قازاقستاننىڭ يتالياداعى ەلشىسى ەربولات سەمبايەۆ ەۋروپالىقتاردىڭ ازيامەن تانىسۋى يتالياندىق اتاقتى ساياحاتشى ماركو پولونىڭ ۇلى جىبەك جولىنىڭ ەداۋىر بولىگى وتكەن قازىرگى ورتالىق ازيا اۋماعىن مەكەندەگەن حالىقتاردىڭ سالت-داستۇرلەرى مەن ءومىر سالتىنىڭ ەرەكشەلىكتەرىن سۋرەتتەگەن شىعارمالارىنان باستاۋ العانىن اتاپ ءوتتى.
«ءبىز اتا-بابالارىمىزدىڭ دالالىق جان دۇنيەسىنىڭ وزىندىك ەرەكشەلىگى مەن سۇلۋلىعى تۋرالى قازاقستاندىق دارىندى كيىم جانە زەرگەرلىك بۇيىمدار ديزاينەرلەرىنىڭ توپتامالارىنداعى جارقىن بەينەلەر ارقىلى جەتكىزگىمىز كەلەدى»، - دەدى ە. سەمبايەۆ.
تانىستىرىلىمدى باس ديرەكتورى سامال تولەڭگىتوۆا «Tekemet-Syrmak» كومپانياسىنىڭ كيىزدەن جاسالعان بۇيىمدار توپتاماسى اشتى. كورەرمەندەرگە كيىزدى جىبەككە باسىپ، جىبەك ماتاعا ەرەكشە ورنەكتەر جاساۋعا مۇمكىندىك بەرەتىن، زاماناۋي تەحنولوگيامەن ۇيلەستىرىلگەن ءداستۇرلى قولونەر ارقىلى جاسالعان شاپاندار مەن شارفتار كورسەتىلدى.
ودان ءارى قازاقستاندىق سانگەرلەر كوپشىلىك نازارىنا ەۋرازيالىق ديزاينەرلەر وداعىنىڭ مۇشەسى، بەلگىلى سۋرەتشى-زەرگەر نۇردوس ءالياسقاروۆتىڭ اشەكەي بۇيىمدارىن ۇسىندى. ۇلتتىق ناقىشتا جاسالعان سىرعا، بىلەزىك سىندى ايەلدەردىڭ ءتۇرلى اشەكەيلەرى كورسەتىلدى.
سونىمەن بىرگە سانگەرلەر زاماناۋي ديزايندا امبەباپ كيىم ۇلگىسى بولىپ تابىلاتىن ەتنو-ديزاينەر ءتاربيا ايدىمبايەۆانىڭ ايەلدەر مەن ەرلەر شاپاندارىنىڭ توپتاماسىن كورسەتتى. تانىستىرىلىم قالىڭدىقتىڭ ءداستۇرلى توي كيىمىن كورسەتۋمەن اياقتالدى.
قوناقتار سونداي-اق كىلەم جانە باسقا دا كيىزدەن جاسالعان بۇيىمدار كورمەسىن تاماشالادى.