ا ق ش قارجى مينيسترلىگى مەملەكەتتىك قارىز شەگى مەرزىمىن اۋىستىردى
وكىلدەر پالاتاسىنىڭ سپيكەرى كيەۆين ماككارتي مەن باسقا دا كونگرەسس كوشباسشىلارىنا جازىلعان حاتتا يەللەن حانىم امەريكالىق زاڭ شىعارۋشىلارعا مەملەكەتتىك قارىزدىڭ شەكتى سوماسىنا بايلانىستى كەلىسىم ورناتۋ ءۇشىن ناقتى شەكتى مەرزىمدى كورسەتتى. شەكتى سوما دەگەنىمىز – ا ق ش ۇكىمەتى شىعىندارىن وتەۋ ءۇشىن زاڭدى تۇردە قارىزعا الا الاتىن قارجى.
بۇعان دەيىن يەللەن ا ق ش ۇكىمەتىنىڭ اقشاسى 1- ماۋسىمدا تاۋسىلىپ قالۋى مۇمكىن ەكەنىن بولجاعان. ەلدەگى جەتىسپەۋشىلىكتى قىسقارتۋعا تىرىسىپ جاتقان ا ق ش پرەزيدەنتى دجو بايدەن مەن كونگرەسستەگى رەسپۋبليكالىق پارتيا وكىلدەرى ءالى دە ەلدە بۇرىن-سوڭدى بولماعان دەفولتتىڭ الدىن الۋ تۋرالى شەشىمگە قاتىستى كەلىسپەۋشىلىكتەردى جويۋعا تىرىسىپ جاتىر.
«ەڭ كەيىنگى قولجەتىمدى دەرەكتەردى نەگىزگە الساق، ەگەر كونگرەسس مەملەكەتتىك قارىز شەگىن 5- ماۋسىمعا دەيىن كوتەرمەسە نەمەسە توقتاتا تۇرماسا ۇكىمەتتىڭ مىندەتىن ورىنداۋعا قازىنادا قارجى جەتكىلىكسىز بولماق»، - دەپ اتاپ ءوتتى يەللەن حاتىندا.
سونداي-اق ول 130 ميلليارد ا ق ش دوللارىنان استام قارجى، جوسپار بويىنشا، الداعى ايدىڭ العاشقى ەكى كۇنىندە الەۋمەتتىك قامتاماسىز ەتۋگە جۇمسالاتىنىن جازدى، ال 5- ماۋسىمنان باستاپ 1 اپتا ىشىندە قوسىمشا شىعىندارعا شامامەن 92 ميلليارد ا ق ش دوللارى كەرەك.
سونىمەن قاتار قارجى ءمينيسترى كونگرەسس باسشىلارىن كەلىسىمگە تەزىرەك كەلۋگە شاقىرىپ، «مەملەكەتتىك قارىزدىڭ شەگىن تومەندەتۋدى نەمەسە ۇلعايتۋدى سوڭعى مينۋتقا دەيىن كۇتۋ بيزنەسكە جانە تۇتىنۋشىلاردىڭ سەنىمىنە ايتارلىقتاي زيان كەلتىرىپ، سالىق تولەۋشىلەر ءۇشىن قىسقا مەرزىمدى قارىز الۋ قۇنىن ارتتىرىپ، ا ق ش- تىڭ نەسيە رەيتينگىنە تەرىس اسەر ەتۋى مۇمكىن ەكەنىن» ايتتى.