اباي وبلىسىنىڭ وقۋشىسى قوي شارۋاشىلىعىن اۆتوماتتاندىرۋ جوباسىن ويلاپ تاپتى

سەمەي. قازاقپارات - اباي وبلىسى اياگوز اۋدانىنداعى قالالىق كوپبەيىندى قازاق مەكتەپ-گيمنازياسىنىڭ وقۋشىسى بەكنۇر ايداربەك قوي شارۋاشىلىعىن اۆتوماتتاندىرۋدى ويلاپ تاۋىپ، شارۋا قوجالىعىنا ۇسىندى، دەپ حابارلايدى قازاقپارات.

ماقسات - شوپان اتا ءتولىن كوبەيتۋ.

جوبانىڭ تيىمدىلىگى:

- زامانۋي جابدىقتاردى پايدالانۋ؛

- جوعارى ساپا؛

- از شىعىن؛

- قوجالىقتاردى اۆتوماتتاندىرۋ ارقىلى شارۋاشىلىق جۇمىسىن جەڭىلدەتۋ.

«جوبادا قويشىنىڭ جۇمىسىن جەڭىلدەتۋ ءۇشىن جەم، ءشوپ ناۋاعا اۆتوماتتاندىرىلعان جۇيە ارقىلى سالىنىپ، سۋ موتور ارقىلى قۇيىلادى.

فەرمانىڭ ءىشى جارىق، تازا. قويلاردى جايۋ ءۇشىن «ەلەكتروقويشى» قۇرىلعىسىن ۇسىنامىز. قۇرىلعى موبيلدى، باسقا جايىلىمعا اپارىپ ورناتۋعا دا بولادى. 2 گەكتار جەر سىممەن قورشالىپ، قوي سول قورعاننىڭ ىشىندە جايىلادى»، - دەيدى 8- سىنىپ وقۋشىسى بەكنۇر ايداربەك.

بەكنۇر جوبانى ىسكە اسىرۋ كەزەڭىندە قاراجاتتىڭ جۇمسالۋىن ەسەپتەپ، ەكونوميكالىق تيىمدىلىگىن دە كورسەتكەن، ماركەتينگتىك جوسپارىن جاساعان.

«جازعى، قىسقى دەمالىس كەزىندە اۋىلعا بارىپ، اتاما كومەكتەسەمىن. شارۋاشىلىقتا مال باعۋ، جەم-ءشوپ دايىنداۋ سەكىلدى جۇمىس كوپ. مەنىڭ ارمانىم - شارۋاشىلىقتى اۆتوماتتاندىرۋعا قول جەتكىزۋ، بۇل اكەم مەن اتامنىڭ جۇمىسىن جەڭىلدەتەر ەدى»، - دەيدى بەكنۇر.

ول «قوي شارۋاشىلىعىن اۆتوماتتاندىرۋ» جوباسىن مامىر ايىندا وتەتىن فەستيۆالعا دايىنداۋدا.