ساۋىقتىرۋ ورتالىقتارىنىڭ جازعى دەمالىسقا دايىندىعىنا مونيتورينگ جۇرگىزىلىپ جاتىر
مونيتورينگ توبىندا وقۋ-اعارتۋ مينيسترلىگى، قونايەۆ قالاسىنىڭ توتەنشە جاعداي، پوليتسيا، ءبىلىم جانە سانيتارلىق-ەپيدەميولوگيالىق باقىلاۋ باسقارمالارىنىڭ وكىلدەرى بولدى.
تاراپتار وقۋ-ساۋىقتىرۋ ورتالىعىنىڭ جازعى دەمالىسقا دايىندىعىن، قاۋىپسىزدىك شارالارى مەن سانيتاريالىق-ەپيدەميولوگيالىق جاي-كۇيىن، بالالاردىڭ قاۋىپسىزدىگىن قامتاماسىز ەتۋ، ءورت قاۋىپسىزدىگىن ساقتاۋ، قۇقىق بۇزۋشىلىقتار مەن قىلمىستاردىڭ الدىن الۋ جانە بالالاردىڭ قاراۋسىز قالۋىنا جول بەرمەۋ ماسەلەلەرىن زەردەلەدى.
وقۋ-اعارتۋ ۆيتسە-ءمينيسترى ەدىل وسپان جازعى دەمالىس ۋاقىتىندا بالالاردى ساۋىقتىرۋ، دەمالىستى ۇيىمداستىرۋ بارىسىندا جۇيەلى ۆەدومستۆوارالىق ۇيلەستىرۋ جۇمىسىن جالعاستىرۋ قاجەتتىلىگىنە ەرەكشە نازار اۋداردى.
«ساۋىقتىرۋ ورتالىقتارىنىڭ جازعى دەمالاسقا دايىندىعىن باقىلاۋ ماقساتىندا جۇمىس توپتارى ءار وڭىردە ءتيىستى شارالاردى قولعا الدى. زەردەلەۋ جۇمىستارى ەلىمىزدەگى بارلىق ساۋىقتىرۋ ورتالىعىندا جۇرگىزىلەتىن بولادى. بالا قاۋىپسىزدىگى مەن دەنساۋلىعى - ۇلكەن باسىمدىققا يە ماڭىزدى ماسەلە. بۇل تۇستا اسقان جاۋاپكەرشىلىك تانىتىپ، بىرلەسىپ جۇمىس ىستەۋىمىز قاجەت»، - دەدى وقۋ-اعارتۋ ۆيتسە-ءمينيسترى ەدىل وسپان.
ايتا كەتەيىك، جازدا بالالارىمىزدىڭ تىنىعىپ، دەمالىسىن جارقىن، كوڭىلدى وتكىزۋى ءۇشىن بيىل قالا سىرتىنداعى 218، مەكتەپ جانىنداعى 10200 پروفيلدىك جانە شاتىرلى لاگەر جۇمىس ىستەيتىن بولادى.