بەيجىڭدە قىتاي تىلىندەگى قازاق اندەرى جيناعىنىڭ تۇساۋكەسەرى ءوتتى
اندەردى اۋدارۋدى مۋزىكا حالىق باسپاسىنىڭ جاردەمىمەن بەلگىلى جازۋشى، قىتاي حالىقتىق ساياسي كونسۋلتاتيۆتىك كەڭەسىنىڭ بۇرىنعى دەپۋتاتى اكبار ءماجيت ۇلى جۇزەگە اسىردى.
ءىس-شارانىڭ قوناقتارى قىتايدىڭ مەملەكەتتىك ورگاندارى، اكادەميالىق جانە شىعارماشىلىق زيالىلارى، قازاق دياسپوراسىنىڭ وكىلدەرى، سونداي-اق قىتايلىق جانە قازاقستاندىق ب ا ق وكىلدەرى بولدى.
قازاقستاننىڭ قىتايداعى ەلشىسى شاحرات نۇرىشيەۆ ءوزىنىڭ ءسوز سويلەۋىندە مۋزىكا مەن اندەر ارقىلى حالىقتار اراسىندا مادەنيەت پەن ادەت-عۇرىپتى تەرەڭىرەك قابىلداۋ ورىن الاتىنىن ەرەكشە اتاپ ءوتتى. وسىعان وراي، ول بۇل جيناق قازاقستان مەن قىتاي اراسىنداعى دوستىق پەن تاتۋ كورشىلىكتىڭ ىرگەتاسىنا تاعى ءبىر جارقىن ۇلەس بولاتىنىنا سەنىم ءبىلدىردى. قازاقستاندىق ديپلومات ءوز سوزىندە بيىلعى جىلى قىتايدا مادەني ءىس-شارالاردى ۇيىمداستىرۋ جوسپارلارىمەن دە ءبولىستى.
اكبار ءماجيت ۇلى (1954-جىلى تۋعان) - قىتاي تىلىندە جازاتىن از ۇلتتارى وكىلدەرىنەن تۇراتىن ق ح ر- دىڭ كورنەكتى جازۋشىلارىنىڭ ءبىرى. 1982-جىلى باستاپ قىتاي جازۋشىلار وداعىنىڭ مۇشەسى، ق ح ر حالىقتىق ساياسي كونسۋلتاتيۆتىك كەڭەسىنىڭ دەپۋتاتى بولعان، ءۇش رەت ق ح ر مەملەكەتتىك سىيلىعىنىڭ يەگەرى، II دارەجەلى «دوستىق» وردەنىنىڭ كاۆالەرى، وننان استام كىتاپتىڭ، ونىڭ ىشىندە اباي شىعارمالارى اۋدارمالارىنىڭ اۆتورى بولىپ تابىلادى.
اكبار ءماجيت ۇلىنىڭ اۋدارمالارى مەن شىعارماشىلىق ىزدەنىستەرىنىڭ ارقاسىندا بۇگىنگى تاڭدا قىتايلىق وقىرماندار قازاق ادەبيەتىنىڭ كورنەكتى كلاسسيكتەرى مەن تانىمال كومپوزيتورلاردىڭ شىعارمالارىمەن تانىسا الادى.