احمەت بايتۇرسىن ۇلى اتىنداعى رەسپبۋليكالىق بايقاۋدىڭ جەڭىمپازى انىقتالدى
ۇلت ۇستازى احمەت بايتۇرسىن ۇلى اتىنداعى رەسپۋبليكالىق بايقاۋدى ءتىل ساياساتى كوميتەتى ۇيىمداستىردى. بايقاۋعا ەلىمىزدىڭ ءار وڭىرىندەگى تىلدەردى وقىتۋ ورتالىعىنىڭ وقىتۋشىلارى قاتىستى.
ءۇش كەزەڭنەن تۇراتىن بايقاۋعا ا. بايتۇرسىن ۇلى اتىنداعى ءبىلىم اكادەمياسىنىڭ ديرەكتورى، احمەتتانۋشى، فيلولوگيا عىلىمدارىنىڭ كانديداتى ۇلان ەركىنباي ءتوراعالىق ەتتى. ال، قازىلار القاسى بىلىكتى پەداگوگ-ادىسكەرلەر مەن عالىمداردان قۇرالعان.
«جىل سايىن كەڭىنەن تانىمال بولىپ كەلە جاتقان ءداستۇرلى بايقاۋدىڭ باستى ماقساتى - ۇلت ۇستازىنىڭ ادىستەمەلىك ەڭبەكتەرىن زەردەلەۋ ارقىلى ونىڭ ءتىل مەڭگەرتۋگە قاتىستى ۇتىمدى ءادىس-تاسىلدەرىن انىقتاپ ناسيحاتتاۋ. سونداي-اق وقىتۋشىلاردىڭ كاسىبي بىلىكتىلىگىن جەتىلدىرە وتىرىپ، ەرەسەكتەرگە قازاق ءتىلىن ۇيرەتۋدىڭ ساپاسىن ارتتىرۋ، ءوزارا تاجىريبە الماسۋ»، - دەدى ۇلان ەركىنباي.
بايقاۋدىڭ العاشقى كەزەڭىندە قاتىسۋشىلار ءوزىن جانە اۆتورلىق باعدارلاماسىن تانىستىردى. ەكىنشى كەزەڭدە ۇياشىقتان تاڭدالعان قوس سۇراققا جاۋاپ بەردى. ءۇشىنشى كەزەڭدە ۇمىتكەرلەر وزگە ەتنوس وكىلدەرىنەن قۇرالعان توپقا وقۋ، جازۋ، تىڭداۋ جانە ايتۋ تۇرلەرىنە تاپسىرما بەرىپ، 20 مينۋتتىق ءدارىس وتكىزدى.
قازىلار القاسىنىڭ شەشىمىمەن بايقاۋدىڭ باس جۇلدەسى مەن 500 مىڭ تەڭگەگە قىزىلوردا وبلىسىنىڭ تىلدەردى وقىتۋ ورتالىعىنىڭ مەملەكەتتىك ءتىل وقىتۋشىسى گۇلجانات دۇزەنوۆا يە بولدى. ءبىرىنشى ورىننىڭ 350 مىڭ تەڭگەلىك جۇلدەسىن جەتىسۋ وبلىستىق «ءتىل» وقۋ-ادىستەمەلىك ورتالىعىنىڭ مەملەكەتتىك ءتىل وقىتۋشىسى جانار ەلەسبايەۆا يەلەندى.
ەكىنشى ورىن مەن 250 مىڭ تەڭگە سىيلىقتىڭ اقتوبە وبلىسىنداعى تىلدەردى وقىتۋ ورتالىعىنىڭ ادىسكەرى اقمارال نۇرجانوۆا مەن قاراعاندى وبلىسىنىڭ تىلدەردى وقىتۋ ورتالىعىنىڭ ادىسكەرى ءمۇنيرا اعىمبايەۆا يەگەرى اتاندى.
ءۇشىنشى ورىننىڭ 200 مىڭ تەڭگەلى جۇلدەسىنە جامبىل وبلىسى، قورداي اۋداندىق تىلدەردى وقىتۋ ورتالىعىنىڭ قازاق ءتىلى وقىتۋشىسى التىناي ءاشىمحان، قوستاناي وبلىستىق «ءتىل-دارىن» وبلىستىق تىلدەردى وقىتۋ ورتالىعىنىڭ ادىسكەرى گۇلميرا كىرىكپەنوۆا، اقمولا وبلىستىق وقۋ- ادىستەمەلىك ورتالىعىنىڭ وقىتۋشىسى ايمان جاقانوۆا لايىق دەپ تانىلدى.