باكۋدە ايگىلى مۇنايشى سافي وتەبايەۆقا بارەلەف ورناتىلدى
ءىس-شاراعا قازاقستاننىڭ ازەربايجانداعى ەلشىسى ءالىم بايەل، ءامموۋ رەكتورى مۇستافا بابانلى، «تەڭىزشيەۆرويل» كومپانياسى باس ديرەكتورىنىڭ ورىنباسارى كوڭىلقوش سۇيەسىنوۆ، سافي وتەبايەۆتىڭ ۇلى ماقسۇت وتەبايەۆ، ءا م م و ۋ وقىتۋشىلارى مەن ستۋدەنتتەرى قاتىستى.
س. وتەبايەۆ 1909-جىلعى 25- مامىردا قازاقستاننىڭ اتىراۋ وبلىسى قاراباۋ اۋىلىندا دۇنيەگە كەلگەن. 1931-1935 ج ج. باكۋ مۇناي ينستيتۋتىندا (قازىرگى ءا م م و ۋ) ءبىلىم العان. وتەبايەۆ قازاقستان مۇناي ونەركاسىبىنىڭ نەگىزىن سالۋشىلاردىڭ ءبىرى بولىپ سانالادى. ەڭبەگى ەلەنىپ، كوپتەگەن مەملەكەتتىك ناگرادالار جانە وردەندەرمەن ماراپاتتالعان. ونىڭ ەسىمى اتىراۋ مۇناي جانە گاز ۋنيۆەرسيتەتى مەن جىلىوي مۇناي-گاز تەحنولوگيالىق كوللەدجىنە بەرىلگەن.
ەلشى ءالىم بايەل ءىس-شارادا ايتقان سوزىندە قازاقستان مەن ازەربايجاندى ورتاق تاريح پەن مادەنيەت قانا ەمەس، ەكونوميكالارىنىڭ ۇقساستىعى دا بايلانىستىرىپ تۇرعانىن اتاپ ءوتتى. ديپلومات تابيعي رەسۋرستاردى ەلدەرىمىزدىڭ دامۋى ماقساتىنا پايدالانۋدىڭ باستى مىندەت ەكەنىن ايتتى.
ءالىم بايەل جينالعانداردىڭ نازارىن قوس مەملەكەت باسشىلارى اراسىندا سەنىمگە نەگىزدەلگەن تىعىز ديالوگتىڭ ورناعانىنا اۋداردى. جوعارى دەڭگەيدە قول جەتكىزىلگەن ۋاعدالاستىقتاردىڭ ناتيجەسىندە بيىل العاش رەت قازاق مۇنايى باكۋ-تبيليسي-جەيحان مۇناي قۇبىرى ارقىلى تاسىمالدانا باستادى. الداعى كەزەڭدە وسى باعىت ارقىلى ەكسپورتتالاتىن قازاق مۇنايىنىڭ كولەمىن ارتتىرۋ جوسپارلانۋدا.
ءا م م و ۋ رەكتورى مۇستافا بابانلى ءوز سوزىندە قازاقستان مەن ازەربايجان اراسىندا جوعارى ءبىلىم سالاسىندا ورناعان ىنتىماقتاستىقتى دامىتۋعا نيەتتى ەكەنىن مالىمدەدى. اتاپ ايتقاندا، ۋنيۆەرسيتەت ق. ي. ساتبايەۆ اتىنداعى قازاق ۇلتتىق عىلىمي-زەرتتەۋ تەحنيكالىق ۋنيۆەرسيتەتىمەن بايلانىستى بەلسەندى تۇردە دامىتۋ ۇستىندە. بابانلى بارەلەفتىڭ اشىلۋى ەكى ەل اراسىنداعى قارىم-قاتىناستى جەتىلدىرۋدىڭ تاعى ءبىر بەلەسى بولعانىن اتاپ ءوتتى.
ءوز كەزەگىندە ماقسۇت وتەبايەۆ بارەلەف ورناتىپ، اكەسىنىڭ ەڭبەگىن جوعارى باعالاعانى ءۇشىن ازەربايجان تاراپى مەن ۇيىمداستىرۋشىلاردىڭ بارلىعىنا ءوز ريزاشىلىعىن ءبىلدىردى.