الاپات اشارشىلىق پەن اياۋسىز قۋعىن-سۇرگىن قازاق شەجىرەسىنە ەڭ شەرلى كەزەڭ رەتىندە جازىلدى - اشىمبايەۆ

استانا. قازاقپارات - مەملەكەت باسشىسىنىڭ تاپسىرماسى بويىنشا سەنات سوڭعى ەكى جىلدا اشارشىلىق تاقىرىبىن زەرتتەۋ جانە حالقىمىزدىڭ باسىنان وتكەن اقتاڭداق جىلداردىڭ اقيقاتىن اشۋ باعىتىندا جۇيەلى جۇمىس جۇرگىزىپ كەلەدى.

سونىڭ ناتيجەسىندە دەرەكتى قۇجاتتار مەن ەستەلىكتەر جيناعىنىڭ بەس تومى جارىق كوردى.

بۇل باستاما تاريحشى عالىمداردىڭ جوعارى باعاسىن الىپ، قوعام تاراپىنان وڭ قابىلداندى، دەپ جازدى بۇگىن ءوزىنىڭ Facebook پاراقشاسىندا ق ر پارلامەنتى سەناتىنىڭ ءتوراعاسى ماۋلەن اشىمبايەۆ.

«بۇگىن ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى قارساڭىندا قاسىرەتتى كەزەڭنىڭ ءىزى قالعان «قارلاگ» مۋزەيىنە ارنايى بارىپ، بابالار رۋحىنا تاعزىم ەتتىك، سونداي-اق، كوپشىلىككە اتالعان جيناقتىڭ جاڭا 6-7-تومدارىن تانىستىردىق.

بۇل ەڭبەككە دە وسىعان دەيىن ەش جەردە جاريالانباعان بىرەگەي قۇجاتتار ەندى. ولاردىڭ 90 پايىزى عىلىمي اينالىمعا العاش رەت شىعارىلىپ، كوپشىلىك ءۇشىن قولجەتىمدى دۇنيەگە اينالىپ وتىر.

شىن مانىندە، وتكەن عاسىردىڭ 30-جىلدارىندا بولعان الاپات اشارشىلىق پەن اياۋسىز قۋعىن-سۇرگىن قازاق شەجىرەسىنە ەڭ شەرلى كەزەڭ رەتىندە جازىلدى. تاريحىمىزدىڭ وسىنداي تراگەديالى تۇستارىن زەرتتەۋ، اشىلماي، جازىلماي كەلە جاتقان جايتتاردى زەردەلەۋ ەلدىك جانە ۇلتتىق مۇددە تۇرعىسىنان اسا ماڭىزدى. جەتى تومدىق جيناق وسى باعىتتا عىلىمي كوزقاراس قالىپتاستىراتىن ىرگەلى ەڭبەك ەكەنى ءسوزسىز»، - دەدى ماۋلەن اشىمبايەۆ.

ول جالپى، تاريحتى تانۋ، وتكەندى ۇمىتپاۋ ۇلتتىق سانانى جاڭعىرتىپ، ۇلتتىق دۇنيەتانىم قالىپتاستىرۋ جولىندا ايرىقشا مانگە يە ەكەنىن ايتادى. سوندىقتان الداعى ۋاقىتتا سەناتتىڭ باستاماسىن ءتيىستى مەملەكەتتىك ورگاندار مەن عىلىمي ينستيتۋتتار قولداپ، زەرتتەۋلەر جالعاسا بەرەدى.

«وسى رەتتە جيناقتىڭ جارىق كورۋىنە اتسالىسقان عالىمدارعا، ارحيۆتەردەگى ماماندارعا، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ۇجىمىنا، مادەنيەت جانە سپورت مينيسترلىگىنە العىسىمىزدى بىلدىرەمىز.

قاراعاندىعا ساپار بارىسىندا وڭىردەگى ءماسليحات دەپۋتاتتارىمەن دە كەزدەسىپ، بىرلەسكەن جۇمىسىمىزدىڭ باسىم باعىتتارىن تالقىلادىق. شيكىزاتتىق ەمەس سالانى دامىتۋ، ينفراقۇرىلىمدى جاڭعىرتۋ سياقتى پرەزيدەنتىمىز بەلگىلەپ بەرگەن مىندەتتەردى ىسكە اسىرۋدىڭ نەگىزگى تەتىكتەرىنە نازار اۋداردىق.

سونىمەن قاتار ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ ستۋدەنتتەرىمەن جۇزدەسىپ، جاستاردى الاڭداتقان ماسەلەلەر جونىندە ءسوز قوزعادىق. ساپار اياسىندا ەرەكشە قاجەتتىلىگى بار سپورتشىلاردىڭ جاتتىعۋىنا دا قاتىسىپ، ولاردىڭ جاي-كۇيىمەن تانىستىق.

قازىرگى تاڭدا قاراعاندى وڭىرىندە كوپتەگەن يگى باستاما ناتيجەلى ىسكە اسىرىلىپ جاتىر. الداعى ۋاقىتتا دا وبلىستىڭ ودان ءارى قارقىندى دامۋىنا شىنايى تىلەكتەستىگىمىزدى بىلدىرەمىز»، - دەدى سەنات ءتوراعاسى.