وڭتۇستىك كورەيادا جولاۋشى ۇشىپ بارا جاتقان ۇشاقتان تۇسپەك بولعان

سەۋل. YONHAP - قازاقپارات - تەگۋ حالىقارالىق اۋەجايىندا جولاۋشى Asiana Airlines ۇشاعىنىڭ ەسىگىن اشىپ، ۇشاق قونىپ جاتقاندا تۇسپەك بولعان، دەپ حابارلايدى قازاقپارات Yonhap اگەنتتىگىنە سىلتەمەمەن.

وقيعا سالدارىنان كوپتەگەن جولاۋشى تىنىس الا الماي قالعان. ابىروي بولعاندا ۇشاق جەرگە ءساتتى قوندى، دەپ حابارلادى رەسمي دەرەككوز.

پوليتسيا ۇشۋ كەزىندە ەسىكتىڭ تۇتقاسىن اشقان 33 جاستاعى ەر ادامدى ۇستادى. چەدجۋ ارالىنان ۇشقان ۇشاق سەۋلدەن 237 شاقىرىم قاشىقتىقتاعى تەگۋعا بەت العان. جەرگىلىكتى ۋاقىتپەن 12:45 تە اۋە كەمەسىنىڭ ەسىگى كەنەت اشىلعان. كەيىن ۇشاق ەسىگى اشىق كۇيى جەرگە قونعان.

ەسىك اشىلعان كەزدە ۇشاق 250 مەتر بيىكتىكتە بولعان. بورتتاعى 194 ادام زارداپ شەكپەگەن، تەك 12 جولۋشىنىڭ تىنىس الۋى قيىنداعان.

كۋاگەرلەردىڭ ايتۋىنشا، كۇدىكتى ەسىكتى اشىپ، ۇشاقتان سەكىرمەكشى بولعان.

«ستيۋاردەسسالار جولاۋشى ازاماتتاردان كومەك سۇراپ، ايقايلاعان. جانىنداعى ادامدار ونى ۇستاپ، ىشكە قاراي كىرگىزگەن»، - دەپ مالىمدەدى جولاۋشىلاردىڭ ءبىرى.