استانانىڭ اۋدان اكىمدەرى «جاڭا ادامدارعا» ەسەپ بەرەتىن بولدى

استانا. قازاقپارات - استانا قالاسىنىڭ اكىمى «جاڭا ادامدار» قوزعالىسىنىڭ وكىلدەرىمەن كەزدەسىپ، اكىمدىك قىزمەتشىلەرىنە جاستار كوتەرىپ جۇرگەن ماسەلەلەردى شەشۋ جونىندە ناقتى تاپسىرمالار بەردى، دەپ حابارلايدى قازاقپارات ءتىلشىسى.

استانا قالاسىنداعى الەۋمەتتىك ماسەلەلەردى كوتەرىپ جۇرگەن «جاڭا ادامدار» جاستار قوزعالىسىنىڭ وكىلدەرى ەلوردا باسشىسى جەڭىس قاسىمبەكپەن كەزدەستى. كەزدەسۋدە قالاداعى جاياۋ جۇرگىنشىگە ارنالعان سوقپاقتاردىڭ ساپاسى سىن كوتەرمەيتىنى ايتىلدى. بۇعان دەيىن قوزعالىس بەلسەندىلەرى اكىمدىككە وتكىزگەن قاۋىپتى تروتۋارلاردىڭ ءتىزىمى قالا كوشەلەرىن جوندەۋ جۇمىستارىنىڭ جوسپارىنا ەنەتىن بولدى. استانا قالاسى اكىمىنىڭ باس ورىنباسارى نۇرلان نۇركەنوۆ اتالعان كەمشىلىكتى جويۋ ءۇشىن بيۋجەتتەن اقشا بولۋگە ۋادە بەردى.

سونداي-اق، ەلوردا اۋداندارىنىڭ اكىمدەرى «جاڭا ادامدار» قوزعالىسىنا اپتا سايىن توسەلگەن پاندۋستار مەن تروتۋارلاردىڭ قالاي جوندەلىپ جاتقانى تۋرالى ەسەپ بەرىپ وتىراتىن بولدى.

«سەڭ قوزعالدى دەۋگە بولادى. ءبىراق ءبىز بۇعان قاناعاتتانىپ، توقتاپ قالمايمىز. قالادا ءالى دە كوپتەگەن ماسەلەلەر بار. ءبىز كوتەرگەن ماسەلە تۇرعىندار ءۇن قوسقاندا عانا ناتيجە بولاتىنىن كوردىك. ءارى قاراي دا استانانىڭ قۇرىلىس ماسەلەلەرىمەن اينالىسا بەرەمىز. بارشا استانالىقتاردى ورتاق پروبلەمالاردى بىرلەسىپ شەشۋگە قاتىسۋعا شاقىرامىن. جاڭا قازاقستان ەل ىشىندە ورتاق جاناشىرلىق، ۇيىمداسقان ارەكەت ارقىلى عانا ورنايدى»، - دەيدى قوزعالىس بەلسەندىسى ارلەن تاڭات ۇلى.

بۇعان دەيىن الەۋمەتتىك ساۋالناماعا قاتىسقان استانالىقتاردىڭ 90 پايىزى تروتۋارلاردىڭ ساپاسىنا شاعىم ايتقانىن جازعان بولاتىنبىز.