وزگە ەلدەردەگى قارۋلى قاقتىعىستارعا قاتىسقاندار جازالانادى: پروكۋراتۋرا ۇندەۋ جاسادى

استانا. قازاقپارات - ەلىمىزدە ازاماتتاردى وزگە ەلدەردەگى قارۋلى قاقتىعىسقا شاقىرۋ تۋرالى ۇگىت-ناسيحات ماتەريالدارىنىڭ تارالا باستاۋىنا بايلانىستى پروكۋراتۋرا ەل تۇرعىندارىنا ۇندەۋ جاسادى، دەپ حابارلايدى قازاقپارات قىزىلوردا وبلىستىق پروكۋراتۋراسىنىڭ باسپا ءسوز قىزمەتىنە سىلتەمە جاساپ.

قۇرمەتتى ازاماتتار!

سوڭعى ۋاقىتتا الەۋمەتتىك جەلىلەر مەن ينتەرنەت-رەسۋرستاردا شەتەل جانە قازاقستان ازاماتتارىن وزگە ەلدەردەگى قارۋلى قاقتىعىستارعا شاقىرۋ تۋرالى ۇگىت-ناسيحات ماتەريالدارى تارالۋدا.

ونىڭ ىشىندە جالدامالى اسكەري توپتار بەلسەندى تۇردە ادامدار جيناپ، ازاماتتارعا قوماقتى جالاقى، سىياقى تولەيتىندىگىمەن قىزىقتىرۋدا.

سوندىقتان قارۋلى قاقتىعىسقا قاتىسقان ازاماتتار ءۇشىن قىلمىستىق جاۋاپتىلىق كوزدەلگەنىن ەسكەرتەمىن.

قازاقستان رەسپۋبليكاسى قىلمىستىق كودەكسىنىڭ 170-بابىنا سايكەس جالدامالىنى ازعىرىپ كوندىرۋ، وقىتىپ-ۇيرەتۋ، قارجىلاندىرۋ نەمەسە وزگە ماتەريالدىق قامتاماسىز ەتۋ، سول سياقتى ونى قارۋلى قاقتىعىستا، سوعىس قيمىلدارىندا نەمەسە كونستيتۋتسيالىق قۇرىلىستى قۇلاتۋعا نەمەسە وعان نۇقسان كەلتىرۋگە باعىتتالعان وزگە دە كۇش قولدانۋ ارەكەتتەرىنە پايدالانۋ نە مەملەكەتتىڭ اۋماقتىق تۇتاستىعىن بۇزعانى ءۇشىن مۇلكى تاركىلەنىپ، 12 جىلعا دەيىنگى مەرزىمگە باس بوستاندىعىنان ايىرۋعا، سونداي-اق ادامداردىڭ قازا تابۋىنا نەمەسە وزگە دە اۋىر زارداپتارعا اكەپ سوققان وسىنداي ءىس-ارەكەت ءۇشىن 20 جىلعا دەيىنگى نەمەسە ءومىر بويىنا باس بوستاندىعىنان ايىرۋ جازاسى قولدانىلادى.

ال قازاقستان رەسپۋبليكاسى ازاماتىنىڭ شەت مەملەكەتتىڭ اۋماعىنداعى قارۋلى قاقتىعىسقا نەمەسە سوعىس قيمىلدارىنا جالدامالىلىق بەلگىلەرى بولماعان كەزدە قاساقانا قۇقىققا سىيىمسىز قاتىسۋى قىلمىستىق كودەكستىڭ 172-بابىمەن سارالانىپ، بەس جىلدان توعىز جىلعا دەيىنگى مەرزىمگە باس بوستاندىعىنان ايىرۋعا جازالانادى.

زاڭدىلىقتى جانە قوعامدىق قاۋىپسىزدىكتى قامتاماسىز ەتۋ، قۇقىق بۇزۋشىلىقتاردىڭ الدىن الۋ، سونداي-اق ادامنىڭ جانە ازاماتتىڭ قۇقىقتارى مەن بوستاندىقتارىن قورعاۋ ماقساتىندا «پروكۋراتۋرا تۋرالى» كونستيتۋتسيالىق زاڭنىڭ 40-بابىن باسشىلىققا الا وتىرىپ، ازاماتتاردى ارانداتۋشىلىققا بوي الدىرماۋعا جانە قولدانىستاعى زاڭناما نورمالارىن مۇلتىكسىز ساقتاۋعا شاقىرامىن.

«قۇقىق قورعاۋ ورگاندارى بەلگىلەنگەن تارتىپكە، قوعامدىق قاۋىپسىزدىككە قول سۇعاتىن كەز كەلگەن قۇقىق بۇزۋشىلىقتىڭ جولىن كەسەدى، سونداي-اق ولارعا جول بەرمەۋ جونىندە زاڭدا كوزدەلگەن شارالاردى قولدانادى»، - دەلىنگەن قىزىلوردا وبلىسىنىڭ پوكۋرورى ن. بيجانوۆتىڭ حابارلاماسىندا.